ХIайп зул жагьилсса жанну

[dropcap]С[/dropcap]овет аьрал Авгъаннава бу­ккан бувсса февраль зурул 15-сса кьини цIакь хьуну дур чил билаятрай аьрали бурж би­ттур буллай жанну дуллусса вирттаврал аьпалул кьинину. Тарихраву ца яла лахъи лавгмур дяъвилун ккаллисса, 10 шинал лажиндарай най бивкIсса (1979-1989 ш.), Авгъан дяъвилуву гьуртту хьуну ур 650 азарунния ливчусса аьраличу, 15031 инсаннал жанну дуллуну дур, миннава 141 дагъус­ттанчу ур.
Андриана Аьбдуллаева
Вирттал дакIнийн бичлачи­сса ва уттавами лахъа-хъун буллалисса митинг хьунни ва кьини МахIачкъалалив Интернационалистурал паркраву (Авгъаннал парк). Авгъаннал аьрщарай Да­гъусттаннал жагьилтурал кка­ккан дурсса къучагъшивурттая бусласисса ихтилатру бунни Авгъаннал Ветерантурал координациялул советрал председатель, къуллугъ кьабивтсса генерал-майор Оьмар Муртузялиевлул, Дагъусттаннал аьрали комиссар Дайтбек Мустапаевлул, ДР-лул захIматрал ва социал иширттал министр Расул Ибрагьимовлул, МахIачкъала шагьрулул хъунаманал хъиривчу Запир Алхасовлул, Дагъусттаннал Авгъаннал Ветерантурал советрал председатель Нажмуттин Акаевлул, Авгъаннаву жан дуллу­сса аьраличунал бу­тта МахIаммад ХIасратовлул, «Да­гъусттан» ГТРК-лул директорнал хъиривчу Ссалам Хавчаевлул.

Оьмар Муртузялиев:
— Жагьилтал Авгъаннаву къуллугъ бан гьан буллалисса чIумал, Дагъусттаннай бакъассагу, Аьрасатнал цайми субъектирдайгума дагъусттанлувтал ххал буллай бивкIссар, вихшала дишин бучIисса, кьянкьа-кьурчIисса буну тIий. Командиртал хъинну рязину бикIайссия жула аьра­литурая. Авгъаннаву буссаксса хIаллай совет халкьуннал багьа бищун къашай­сса давуртту дурссар та билаятрал халкьуннан кумагран­сса. Дурссар диялсса къатри, ххуллурду, цIуллу-сагъшиврул идарартту, дуллуссар авгъаннал халкьуннан кIулшивуртту, був­ссар хъунмасса медициналул кумаг. Билаятрал бивхьусса бурж лайкьну лавхъссар тай шиннардий дагъусттанлувтуралгу. Ва жува гьарица шинах батIайсса интернационалистурал паркраву та-дунугу дацIан данссар чил билаятрай аьрали бурж лахълай жанну дуллуминнансса гьайкал ва тIитIинссар аьралуннал бюхттулшиврул музей тIисса умуд бур.

Дайтбек Мустапаев:
— Авгъаннал аьрщарай дяъви нанисса 10 шинал лажиндарай оьрмулуцIа хьуну ур 150 31 инсан, 54 азаруннийн бивсса медициналул зузалтрайн щавурду дирну дур ва личIи-личIисса цIунцIияртту хьуну дур, 416 азара инсан цIуцIаврил увгьуну ур, 264 аьраличу ятIа-тIар бакъа акъа хьуну ур.
Авгъаннал аьрщарай къуллугъ буллай бивкIсса 600 азарунния ливчусса аьралитурава 3,5 азара да­гъусттанчу ур. Та дяъвилий ккаккан дурсса къучагъшиврухлу орденнан лайкь хьуну ур 769 дагъусттанчу, 109 жагьил мушакъат хьуну ур, мукьа ятIа-тIар бакъа акъа хьуну ур. КIия дагъусттанчунан аьпа­лул хьуну махъ Совет Союзрал Виричунал цIа дуллуну дур. ХIакьину Дагъусттаннай ялапар хъанай ур интернационал бурж лахълай ивкIсса 2648 инсан. Тай захIматсса кьинирдугу лайкьну лархъун, зана хьуминнан чIа тIий ура цIуллушиву ва тIайлабацIуртту. Щак ба­къар зу мудангу цаннал чIарав ца бацIланшиврий, «Аьрали иширттал ветеран» тIисса бу­сравсса цIа лайкьну дуручланшиврий. ХIакьинугу ттурша­хъул да­гъусттанлувтал къуллугъ буллай бу­ссар Сириянал билаятрай, 400 аьраличу шинал ахирданий зана хьуссар, Аьра­луннал хъуниминнал бивхьу­сса буржгу лайкьну биттур бувну.
Жула чиваркIуннал къучагъшиврия мудангу цIа диркIссар.
Митинг къуртал хьуну махъ, Авгъаннаву интернационал бурж биттур буллай, жанну дуллуминнал гьайкаллачIа тIутIив дирхьунни.