[dropcap]Ф[/dropcap]евральданул 28-нний ДР-лул ХIукуматрал Председатель Артем Здунов хьунаавкьунни Спортрал министерствалул зузалтращал. Ххал бивгьунни министерствалул давурттал агьамми ххуллурду, ялун дучIансса чIумуву дансса давурттал планну, зузалтрал политика.
Республикалул спортрал министрнал кIанайма МахIаммад МахIаммадовлул бувсунни Дагъус­ттаннай физкультуралул ва спортрал давурттаву хьхьичIуннайшивуртту хьун дувансса ххуллурдая, олимпий луртанну хIадур даврия, агьалинаву спорт машгьур баврия. Министр­нал бувсунни цIанасса ппурттуву­сса спортрал тагьардания, лябу­кку бансса ххуллурдая, диялдакъашивурттая ва му духлаган дансса давурттая.

***
Гара кьини ДР-лул ХIукуматрал Председатель Артем Здунов ивунни республикалул Туризмалул ва халкьуннал художествардал касмурдал министерствалийн. Микку хьусса батIаврий премьер-министрнахь бувсунни ведомствалул иширттал хIакъираву, мукунма ххал бивгьунни туризмалул ва халкьуннал касмурдал давурттаву лябукку хьун бансса чаранну. Хьунабакьаврий ялагу ххалбивгьунни Каспий хьхьирий круизрал жамирдал давурттал, причалданул сооруженияртту даврил, хьхьирил вокзал баврил, таможнилул терминал баврил масъалартту.
Артем Здуновлул тапшур бунни мартрал 16-нин ми цинярда объектирдал хIакъиравусса цалва пикрирду бусан, дуван судоходствалул рынокрал анализ.

***
Гара кьини ДР-лул ХIукуматрал Председатель Артем Здунов кIул хьунни Дагъусттаннал Жагьилтурал иширттал министерствалул давурттащал. Премьер-министрнал ихтилат хьунни министр­нал кIанайма Камил Сяидовлущал ва зузалтращал.
Артем Здуновлухь бувсунни цукунсса давуртту дуллай бу­ссарив ведомствалул зузалтрал. ХIукуматрал Председательнал маслихIат бунни министрнахь цайми регионнал опыт лахьхьин, хаснува кадетътурал школардащал­сса давурттал опыт. Ихтилат хьунни наркотикирттайн къаршисса давурттал лагрулийсса профилактикалул давурттая, жагьилтуран аьркинсса инфраструктура да­къашиврия.
Артем Здуновлул тапшур бунни хIадур дуван идеологиялул давуртту дузрайн дуккан даврил хIакъиравусса план.
ХIадур бувссар
ХI. Аьдиловлул