ЦIуссалакрал 1-мур ДСЮШ-рал тарбиячи, тренер ХIаммадов Русланнул хIадур бувсса чIава каратистътал гьуртту хьуну бувкIунни Волгоград шагьрулий хьусса «Кубок Повольжья» каратэ-кекусинкайрал турнирданий.
Жула командалувасса ацIа оьрчIава урчIуннал бувгьунни хьхьичIунсса кIанттурду. Турнирданий гьуртту хьусса чIава спортсментал бур цIуминалийсса ЦIуссалакрал райондалиясса.
Турнирданул чемпион ва кубокрал заллу хьунни ХIажиева Амина. ХIаммадов Халидлул, Сайпуллаев Астемирдул, Самадов Сиражуттиннул ва Кьурбанов АхIмадлул бувгьунни кIилчинсса кIану. АьвдурахIманов Ванатил, Оьмариев Шамиллул ва ХIусниев Давудлул бувгьунни шамилчинсса кIану.
Ххувхьуминнан буллунни кубокру, медаллу ва дипломру.
Турнир къуртал хьуну махъ, оьрчIащал бунни Виричу-шагьру Волгоградрайсса тарихрал кIанттурдайнсса ва Мамаев Кургандалийнсса экскурсия. Ва хьунни оьрчIан дакIний личIансса турнир ва хъама къабитайсса асардащалсса аьрххи.
***
ЦIуссалакрал райондалул 1-мур ДЮСШ-рал спортсментурал республикалул ва Аьрасатнал даражалийсса соревнованиярттай хьхьичIунсса кIанттурду бувгьуну, жува цимилгу ххари бунну. Ва ххуллухгу Дагъусттаннал Первенствалий цалчинсса кIану бувгьусса чIава боксер Юсуп Аьлиев данди увккунни Владикавказ шагьрулий хьусса СКФО-рал Первенствалий 46 ккилорал кIушиву дусса спортсментуращал. Турнирданий ванал бувгьунни кIилчинмур кIану. ЦIана Юсуп Аьлиев дуклай ур цIуминалийсса ДучIиннал школалий.
***
Къарачай-Чаргаснал республикалий СКФО хьусса грепплинг спортрал турнирданий жула спортсмен МухIаммад ХIажиевлул ккаккан бунни цува яла хьхьичIунма ушиву. МухIаммад, 71 килорал кIушиву дусса хъинну итххявхсса спортсменнащал данди увккун, ххув хьунни. МухIаммад вардиш уллай ур ЦIуссалакрал 1-мур ДЮСШ-рал ца яла хьхьичIунма тренер Абачараев Сулайман.
***
Март зурул 3-4-нний ЦIуминалийсса ЦIуссалакрал шяравусса гимназиялул спортзалдануву хьунни Ватан дуруччултрал кьинилун хас дурсса, «Кубок Халаки» ММА-рал хIала-ккаласса данди буккавурттал республикалул турнир. Турнир сакин дурну дия райондалул спортрал активрал ва жагьилтурал сипталийн бувну.
Соревнованиялийн оьвкуну бия Олимпий чемпион Ширвани Мурадовлуйн, спортрал ветерантурайн, СССР-данул боксрал чемпион ХIажимет КьурбанхIажиевлуйн ва Буттал кIанттул цIанийсса Хъун дяъвилул ветерантурайн.
Цалчинсса кIану бувгьунни ЦIуссалакрал 1-мур ДЮСШ-рал командалул. КIилчинмур кIану – «EaglesMMA» МахIачкъалаллал шагьрулул командалул. Шамилчинмур кIану – ЦIуссалакрал райондалул ЦIуссаккуллал шяраваллил командалул.
Ххув хьуминнан ва цинявппагу гьурттучитуран буллунни кубокру, медаллу ва хIурматрал грамотартту. Жагьилтуран дуллунни « NFC чемпионнал хасъсса мухIлу».
ХIадур бувссар
Имара Саидовал
