Барча, хъамий, зул бюхъу!

Мартрал 7-нний Ваччав хьунни «Ттул жагьилшиву» тIисса цIанилу 60 шинава ливчусса хъаннил дянивсса конкурс.


Конкурс дия шанма журалул: балай учаврил, къавтIаврил, интермедия ккаккан баврил. СахIналийн буклай бия хъинну ххуйсса ва чурххардий даркьу­сса миллатрал личIи-личIисса журалул лаххиярттавусса душру-хъами.Бия вайннаву шяраваллаву, райондалий шайсса тяхъашивурттавух гьуртту шайсса балайчиталгу, къавтIалтгу. Вайннал балайрдан, къавтIавурттан кьимат бишлай бия ХIажиева РайхIанат бакIчисса жюри.

Балай учаврил бяст-ччалливух гьуртту хьуна мяйя балайчи: Минажат Ухмачева (ЦIущар), ПатIимат МахIаммадова (Ккул), Валентина Щаллаева (Ссухъиящи), Аминат Ибаева (2-мур ЦIувкIул), Мариян Мяммащаллаева (Вихьул), Къис­ттаман Гъулбасарова (СумбатIул), Качар Шагьмандарова (Хъусращи), Шавлухъ Илдарова (ЧIяйми). КъавтIаврил бяст-ччалливух гьур­тту хьуна СумбатIуллал ва ЧIяйннал коллективру. Шамилчинмур бяст-ччалливух гьуртту хьуна анжагъ ца ЧIяйннал коллектив.

Бяст-ччалливух гьуртту хъанахъими сахIналийн букканнинсса мутталий тамашачитурал хьхьичIун бувккун, балайрду увкуна, къавтIавуртту дурна Ккуллал райондалул шяраваллал культуралул зузалтрал – ХIабибуллагь Кьурбановлул, Басират ХIусайновал, ПатIимат Каптаровал, Сулжана АхIмадовал, Гриша Ванатиевлул, Асият МахIаммадовал, Шавлухъ СалихIовал, Вихьуллал культуралул къатлул зузалтрал ккаккан дурна къавтIаву.

Балай учавриву цалчинмур кIану бувгьуна Ккуллал шяравасса МахIаммадова ПатIиматлул ва Вихьуллал шяравасса Мяммащаллаева Марияннул, кIилчинмур – Ссухъиящиял шяравасса Щаллаева Валентинал, шамилчинмур – конкурсравух гьуртту хьусса ливчIми ххюягу балайчинал. КъавтIаврил конкурсраву цалчинмур кIану щинчIав къабуллуна. КIилчинмур кIану буллуна СумбатIуллал коллективрахьхьун, шамилчинмур – ЧIяйннал коллективрахьхьун. Шамилчинмур конкурсраву ца ЧIяйннал команда дакъа гьуртту къархьуну тIий вайннан буллуна кIилчинмур кIану.

Конкурсравух гьуртту хьуминнан арцущалсса конвертру буллуна Ккуллал райондалул Ветерантурал советрал председатель Загьидиев Аьбдуллул. Цалчинмур кIану бувгьуминнан дуллуна шаназарда, кIилчинмур кIану бувгьуминнан – кIиазарда, шамилчинмур кIану бувгьуминнан – азарда къуруш.

Барча, душрув, зул гьунарду!
Лажин хIадур дурссар ХIажимурад ХIусайновлул