Луттирал кIану ссалчIав къабугьайссар

ХIакьинусса, интернетрал биялагу, кашигу хъуннасса, заманнай луттирал сий яларай дагьну духьурчагу, библиотекарттугу, хьхьичIва кунма, бувцIуну бакъахьурчагу, чансса бакъар цIанагу луттирал кьадру-кьимат кIулсса, чагъарданул кьанкьгу, щурщугу тIааьнсса, библиотекалуву щябивкIун луттирая неъмат ласайсса.
ОьрчIалми къахIисавну, хIакьину МахIачкъалалив бур 17 биб­лиотека.
Цукунсса дур миннул тагьар, бурив библиотекарттал муданма­сса буккулт, цуксса авадансса дур миннул фонд.
Вай гьантрай на хьунабавкьура МахIачкъала шагьрулул ЦБС-рал (Централизованная библиотечная сеть) хъунмур Ушанова Зулпат Шахшаевнащал.


— Зулпат, буси вила даврия, инава каялувшиву дуллалисса библиотекалул сетьрал тагьардания.
— Шикку зий ттул 11 шин хьунни. Сетьравун 17 библиотека бухлахиссар. Жулмур библиотека (Шамиля, 46) агьаммур бур, вайми жул филиаллу хъанай бур. МахIачкъалалив ба­къассагу, жул филиаллу буссар Богатыревка, Шамхал, Шамхал-Термен, ЦIусса Хушет поселокирттай.
Жул даврил агьаммур мурад бур луттирах гъира бутаву, чIявусса буккулт кIункIу баву. Шинал лажиндарай жул библиотекалул дур­ссар 1400-нния лирчусса, чIявусса инсантал гьуртту хьусса мероприятияртту. Луттирду ккалаккими чан хъана­хъаврийн бувну, утти жун пикри хьунни детсадирттая байбивхьуну зун. Библиотекарьнал, садикирттайн лавгун, оьрчIахь ккала­ккиссар миннал оьрмулун лав­хьхьусса произведенияртту. ОьрчIру мюрщину бунува луттирдахух гьан бан аьркинссар. Амма хIакьину чIявуми ниттихъал чIун дакъар.
Гьарица шинах, май зуруй, библиотекарттал зузалтрал, оьрчIал оьрмулух бурувгун, сакин дайссар миннал буккинсса луттирдал сияхI. Ялув бацIан аьркинссар оьрчIал ми буккиншиврул. ХIакьину итабакьлакьисса оьрчIансса луттирду бур хъинну ябацIансса, яргсса, гъира бутансса.

— ЦIанасса интернет-технологиярттал заманнай библиотекарттавун заназимигу чансса бухьунссар?
— Гьай-гьай, совет заманнай кунма, читальный заллу бувцIуну бакъар. Дянивну гьантлун 45 инсан учIай жул библиотекалийн. ХьхьичIа 75 инсан учIайссия. Ши­ккува бусан, жу цасса глобал сетьравугу буссару. Жул электрон биб­лиотекагу буссар. ЧIявуминнал мугу ишла бувай.

Зулпат Ушанова Ккуллал шяравасса бур. Бувну бур МахIач­къалалив.
Школа къуртал бувну махъ бувххун, 1987 шинал къуртал бувну бур Москавуллал культуралул институт. Муния шихунмай библиотекалул давриха зий бур. Байбивхьуну бур А.С. Пушкиннул цIанийсса Миллатрал библиотекалия. Микку отделданул хъунмурну зий 15 шин дурну дур.
Мунияр махъ МахIач­­къ­а­лаллал ЦБС-рай каялувшиву дуллан бивкIун бур. Зулпат бур Дагъусттаннал культуралул лайкь хьусса зузала.

— Шаппа буккин ччиминнахьхьун шаппай итабакьайссарив луттирду?
— Булайссар, так 15 гьантлий­сса. Паспортращал увкIун, чивчуну, цанма аьркинсса лу шаппай ласун шайссар гьарица инсаннаща. Ччинаща, электрон библиотека тIивтIуну, электрон версиягу ласун шайссар. Му журалий луттирду ласавриву хIакьину мадарасса къулайшивуртту дур. Масала, аьркин­сса лу библиотекалуву бакъахьурча, бувагу республикалий бакъахьурча, электрон журалий му ласун, буккин бюхълай бур, Лениннул цIанийсса паччахIлугърал биб­лиотекалувун бувххун. ХьхьичIва ди­ссертация чичлачисса инсантуран, аьркинсса литература ххилтIу бан, масала, Москавлив гьан багьайва. Утти шаппа буна буккин бюхълай бур.
ЦIана электрон библиотека так жучIа бур. Жу икьрал дур­ссар ми филиаллавугу зузи бан. Бур буккулт чагъарданий бивщумур буккин ххирассагу. Ца оьр­мулул хъунасса буккул тIива: «Ча­гъарданул щур-щур асар къахъана­хъисса лу ккалан цукунсса гъира бикIайссар?».

— Ци учин бюхъанссар биб­лиотекалул фондрая? Цуксса ччяни цIу буккан бай­ссар му? Шайрив зун луттирду бахшиш бувсса ишругу?
— Аьмну цинявппагу филиаллащал жул фондраву буссар 450 азарва экземпляр. Арцу дакъашиврийн бувну, луртан цIу дуккан даву ялу-ялун чанну хъанай бур.
Жун бахшиш байссар сигнальный экземплярду. Федерал прог­раммарттайн бувну, булайссар луттирдугу. Амма, хьхьичIрасса шиннардих бурувгун, чанну буллай бур.

— Миллатрал литературалул, лакрал литературалул фондрая ци учин хьунссар?
— ЖучIа салкьи хьуну бур цила чIумал жува лавсун бивкIсса ва автортурал цала бахшиш бувсса лу­ттирду. ЖучIа бур 80-ку шиннардийнин бувксса луттирду. Муния махъми хъинну чанну бур. Махъсса шиннардий чанну итадакьлай бур миллатрал литература. Хъиннува чанну бур словарьду. Мирив цIана тIалавну бур, цIухлай бур, инсантуран цала ниттил маз лахьлан ччай бур. Лакралмур дакъасса, вайми Дагъусттан миллатирттал литературалулмур фондгу мискинсса дур. Уттигъанну жун ххаллилсса сборник бахшиш бунни МахIаммад-Загьид Аминовлул арснал.

— Цими инсан ур хIакьину зул сетьрай зий?
— Аьмну 116 инсан зий уссар цIана. Даврийн кьамул буллалийни, библиотекалул даву кIулми язи бугьару. ЧIявусса зузалт гуманитар кIулшивуртту ларсъсса бур.

— Ци журалул литература ккалай бур, тIалавну бур хIакьину?
— ЛяличIину тIалавну дур их­тиярдацIун (правовое), меди­циналуцIун, цания ца отраслилуцIун дархIусса литература, дуккавриву – курсрал, дипломрал давуртту чичлачийни аьркин шайсса учебникру. Масала, правовая литература электрон журалий дуккин къулайну дур, цанчирча законнаву ччя-ччяни дахханашивуртту хъанай дур, чагъарунний бивщумур ччяни бух хъанай бур. «Гарант плюс» тIисса хасъсса программалийхчIин жуща электрон журалий дулун бюхълай бур дахьва бувксса, цIусса информация.

— Классика?
— ВУЗ-ву буккин ккаккан бувмур ласлан бикIай. Амма хIакьинусса жагьилтуран ттизаманнулмур литературалухсса гъира ххишала­сса бур. Пилевин, Акунин ххира­сса бур. Оьрмулул бугьараминнан романтикалул произведенияртту ччай бур.
— Ци чIа учин ччива жула, зула буккултран?
— Ккалаккияра луттирду. Луттирдал инсаннан дуниял тIитIайссар, мунал аькьлу-кIулшилул даража гьаз байссар. Луттирал кIану ссалчIав къабугьайссар.

Ихтилат бувссар
Андриана Аьбдуллаевал