Шамил Рамазанов Ккуллал райондалул администрациялул зузалтращал

Мартрал 6-нний Ккуллал райондалул бакIчи Сулайманов Сяид цува рязину даврия укьаврийн бувну, ванан кIанай цама ивтунни. Ва кьини райондалул администрациялул залданувун райондалул цIусса бакIчинащал кIул буван бавтIун бия администрациялул зузалт, идарар­ттал каялувчитал, шяраваллал бакIчитал.

Сяид ХIасниевичлул бувсуна цува, цалла цIуллушиву хьхьара шаврийн бувну, даврия укьлакьишиву ва цала кIанай итан ккаккан увну ушиву Дагъусттаннал шяраваллил хозяйствалул институтраву зий ивкIсса Рамазанов Шамил Рустамлул арс.

Рамазанов Шамил увну ур Ккуллал шяраву 1982-ку шинал.Буттал шяраву школагу къуртал бувну, дуклан увххун ур Да­гъусттаннал шяраваллил институтравун. Ванал язи бувгьуну бур агрономнал ва экономистнал пишарду. Ва ур шяраваллил хозяйствалул элмурдал кандидат.

Шамиллул спортравугу дур хьхьичIуннайшивуртту. Ваная хьуну ур кIийла армспортрал (кадишаврил) дунияллул чемпион. ЧIа учинну райондалул бакIчинан кIанайманан тIайлабацIуртту.

ХI. ХIусайнов