ТIуркIулул ялун ххи дурсса минутIрай дяркъусса дакIру гъили ларгунни

Мартрал 2-нний Каспийскалий дайдирхьунни, кIинттул дялирчIсса, Аьрасатнал футболданул чемпионат. МахIачкъалаллал «Анжи» команда ччалли дурккунни Къазаннал «Рубин» командалущал.

Руслан Къардашов
Дия дяркъу ва марч бусса кьини. Футболданул майданнив «Анжи» командалуву увккунни 3, «Рубиндалуву» 5 цIуну кьамул бувсса футболистал. Цалчинмур таймрай «Рубин» командалул хIарачат буллай дия цила усттаршиву ккаккан дан. Гьужумчи Сердар Азмуннул цала къинттуллухун гьан бувсса ттуп, щяв щун къабивтун, Эвелин-Поповлул запI учин бувну жулва къапулийх бивщунни – гол.

КIилчинмур таймрай «Анжилул» хIарачат буллай дия цила чулухунмай тIуркIулул тIайлабацIу кIункIу бан.
ТIуркIулул ялун ххи дурсса минутIирттай дахьва футболданул майданнив увксса «Анжилул» гьужумчи Лесканал бавкьунни «Рубиндалул» къапулувун ттуп – 1:1. Ва счетрайну бяст-ччал къуртал хьунни. «Анжилул» хъиривмур тIуркIу хьунтIиссар мартрал 10-нний Уфалий, «Уфа» командалущал.

«Анжи» — «Рубин» — 1:1
Голлу: Попов, 36 (0:1), Лескано, 90+1 (1:1)
«Анжи»: Лория, Тетрашвили (Калмыков, 78), Полуяхтов, Хубулов, Будковский, Поку (Бакаев, 43), Самарджич, Маркелов, Брызгалов, Данченко, (Лескано, 89).
«Рубин»: Джанаев, Кузьмин, Поберезкин, Гранат, Могилевец, Энаке, Азмун (Гекрекиз, 73), Навас, Нобоа, Попов (Жемалетдинов, 89), Камболов.