«Красивый пример» ягу «красивая задача» – вай махъру Нураттин МахIаммадович Маммаевлун яла ххирами махъруя» тIий, дакIнийн бутлай ур МахIачкъалалив инженернал къуллугърай зузисса чIурттащиричу Хасаев ХIусман Аьрабинал арс.
Гъумучиял школалий математикалул дарсру дихьлай ивкIсса Нураттин Маммаевлуя, ххуйсса чичрурду дия цIусса шинал «Илчи» кказитрай, мунал 90 шин хъанахъисса таварихрацIун бавхIуну. Барчаллагь ххуйсса учитель дакIнин утаврихлу. ХIусман Хасаевгу ванал ученикри.
Ванал ттухьва бувсмургу чичлай ура кутIану, цайминнал чивчумур тикрал къахьунсса куццуй. Вайнна ванал тIимур:
— На дуклай ивкIсса 1978-79 дуккаврил шиннардий сентябрь зуруйва итталун агьунна Нураттиннун.
Мунал мукунсса хасият дия, математикалул итххявхми най буна кIул бувну, ми хъиннува итххяххан бансса даву дуллан икIайсса. Нагу мунал янилун агьунав. Ттухь увкунни: «Ина, ХIусман, «Квант» тIисса журнал чича, чара бакъа», — куну. На му журнал бучIан буллан ивкIра.
Муний дикIайва контрольный давуртту, дуклакими итххяххан бан кумаг буллалисса ва институтравун буххан ччиминнан кумаг буллалисса. Мукун Нураттин МахIаммадович ттущал 2 шинай (9-10-ми классирттаву) зий ивкIуна.
На 10 класс бувккукун, мунал цIувххунни, цумур вуз-равун уххан най ура куну. Бусав политехнический институтрал приборостроительный факультетрайн буллушиву документру. Мивун 2 экзамен дия математикалул, ца дакIних, цагу чичрулий дулун аьркинсса.
Нураттиннул увкунни чара бакъа цувгу учIантIиссара, вилла экзамен дусса кьини ттун баян бува куну. Нагу баян бувссия.
Экзаменгу дуллуну, увккун най ура (ккаккан дурсса чIумуяр ца ссятрал хьхьичI), Нураттиннул цIувххунни ци суаллу бия ва ми цукун бартбигьав куну. Нагу бусав нара дурмур. Мунал, ми дурсса куцгу ххал бивгьуну, увкунни:
— Хасаев, ина гьарзат тIайлану дурну дур, ца примердануву чансса гъалатI итабавкьуну бур, та на вин мукун лахьхьин къабувссияхха, — куну. Цала канихьсса аьсав щяв къуч учин дуруна. Му экзамендалий ттун «4» бивхьуну бия.
ДакIнихмур экзамендалул комиссиялул председательну Къаллаев Саэд тIисса Карашатусса чув ия. Микку ттун «5» бивхьуна.
ХIасил, Нураттин МахIаммадовичлул цала дуккин бувсса оьрчIру цума чун ухлахиссарив ва ми цукун бувхссарив кIул бан хъирив ацIайсса ххаллилсса хасиятгу дия.
Мукун, НураттиннучIа дуклай бивкIная ххуйсса математиктал хьуну, жул ЧIурттащиял школа ваца математикалул «уклон» дусса школа хьуна учингу бучIиссар. КIикку дарс дихьлай бивкIми, — Ханов Бадруттин, Мусаев Аьлил, МахIаммадов ТIажив, Мудуев Шагьимардан, Давыдов Айгун, Кьадиров Руслан, ХIадис ва Исрапилбаг Мудуевхъул, МахIаммадов Исмяил, ХIажиева Тамара, Хасаев ХIусман мунал ученикталъя. Жул школалия математикалул чулуха итххявхсса оьрчIру ва душру буккаву Нураттин МахIаммадовичлул биялдарайсса ишри. Аьпа баннав цал.
Ттун дакIнийри, Нураттин чIявуну ЧIурттахьхьун цала дус МирзаханнучIан учIайва, ххуйну музыкагу бивщуну, балайрдугу тIий бикIайва. МГУ бувккусса оьрчIрур тIий, вайннал цIарду бюхттулну дикIайва Гъумук ва цайми щархъаву.
ТIайласса даву дуллалиссар Нураттиннул юбилей дансса пикри шаву. Гъумучиял школданун мунал цIа дизангу лайкьссар.
ХIусайн Давыдов, Дагъусттаннал
образованиялул отличник,
ш. ЧIурттащи
