Хаджаевлул караматсса дуниял

Февральданул 28-нний МахIачкъалалив П.С. ХIам­затовал цIанийсса Дагъусттаннал изобразительный иску­сствалул музейраву тIиртIунни Аьрасатнал ва Дагъусттаннал лайкь хьусса художникАльберт Хаджаевлул хъуннасса выставка. Му тIитIлатIисса шадлугърайн бавтIун бия хъинну чIявусса инсантал. Ва хъанай дия художникнал 80 шинал юбилейран хасну дуллалисса персонал выставка.


Бадрижамал Аьлиева
Выставка тIитIлатIисса ихтилат бувна музейрал директор СалихIат ХIамзатовал.
— Альберт Хаджаевлул давуртту мудангу дуссар жул музейрдал пахруну, чIюлушиннану. Ларайсса пишакаршиврийну, хъинну хъирив лавну дурсса дур гьарцагу сурат. Альберт, ххаллилсса художник акъа­ссагу, ур гьунар бусса педагог, цикссагу цIанихсса художниктал тарбия бувсса. Му бакъассагу, художник-график хIисаврай, Альбертлул щаллу бувну бур дагъусттаннал ва москавуллал издательстварттал итабавкьу­сса 200-нния ливчусса луттирду, — увкунни ванил.

Гихунмай ихтилат бувсса ДР-лул культуралул министрнал хъиривчу Мурад ХIажиевлул республикалул культуралул министрнал буржру чIумуйну би­ттур буллалисса Зарема Буттаевал цIания барча унни Альберт Хаджаев, баян бунни мунан Министерствалул чулухасса барчаллагь, республикалул искусствалуву ва культуралуву бивхьу­сса хъунмасса захIматрахлу.

Махъру мукунма лавхъуна ДР-лул Художниктурал союзрал председатель Кьурбан­аьли МахIаммадовлул, ДР-лул Жяматийсса палаталул председатель АьбдулхIалим Мачаевлул, М. Жамаллул цIанийсса Да­гъусттаннал Художествалул училищалул директор Мухтар Камбулатовлул, цIа дурксса журналист Алик АьбдулхIамидовлул, шаэр Шейит-Ханум Аьлишевал, хореограф Тарият Къапиевал, Аьрасатнал ва Дагъусттаннал лайкь хьусса художник Хайруллагь Кьурбановлул, Аьрасатнал искусствалул академиялул член-корреспондент, художник Аьбдулзагьир Мусаевлул ва цайминналгу.

ГьунчIукьатIрал шяраваллил жяматрал чулуха махъру лавхъуна ХIажибутта ХIусайновлул ва Жаруллагь Керимовлул.
Ва кьини ихтилатру бувми кIицI лаглай бия Альбертлул цалва оьрмулуву бувгьусса кIанттурду, педагог хIисаврай икIу, уртакь, хьхьичIунсса дус хIисаврай икIу, чIурчIав дуллай бия махъа нанисса ник тарбия давриву, республикалул магьирлугъ хьхьичIуннай давриву ванал бивхьусса хъунмасса бутIуй. Гьарцаннал ванацIун бавхIуну бусансса хавардугу къачанъя.
Увну ур Альберт декабрьданул 24-нний Буйнакск шагьрулий.

Революционертурал, чичултрал, аьлимтурал авадан­сса ГьунчIукьатIрал шяраваллин му чIумал ча кIулну бикIанссия дунияллун цала хъунасса художникгу уллай бушиву. Альбертлул къуртал бувну бур А. Кутателадзел цIанийсса Ттуплисуллал паччахIлугърал художествалул академия, живописьрал факультет, цалва гьунар лавай буллай зий ивкIун ур Евгений Лансерел ученик, Гуржиял халкьуннал художник, профессор Корнелий Санадзел мастерскойлуву. Академия къуртал бувну махъ дарсру дихьлай ивкIун ур М. Жамаллул цIанийсса Дагъусттаннал художествалул училищалуву, ванал итабавкьусса художниктурал ва дизайнертурал сияхIрай дур цимирагу яргсса цIа.

Реалист хIисаврай ванал канила дурксса чIярусса давуртту лайкь хьуну дур дунияллул даражалий­сса наградарттан. Ванал творчествалуву хъинну хъунмасса кIану бугьлай бур буттал шяраваллил ГьунчIукьатIрал, лакрал цаймигу шяраваллал, лак­рал миллатрал хьхьичIунсса инсантурал суратирттал. Ми, мяйжаннугу, анжагъ суратру дакъар, миннуву бур миллатрал тарихгу, хIакьинусса кьинигу, бучIантIимургу, лавгмунил аьзав­гу, пахругу, бучIантIимунил буруккингу.

Альберт Хаджаевлул П. ХIам­затовал цIанийсса музейран пишкаш дунни цалла давурттавасса ца – «Бариятлул портрет».
Официал бутIа къуртал хьуну, суратру циняв ххал дурну махъгу инсантал шаппа-шаппай анавар буклай бакъая, муния тинмайсса ихтилатру лахъи лавгуна нахIу-нацIушивурттал ссуп­ралух.

Выставкалия махъгу Альберт Хаджаевлуя бусланмур къачанья, хаснува мунал живописьрал ва оьрмулул дарс дирхьусса Алик АьбдулхIамидовлул.
— Альберт Захаровлуя учинмур ттул чIявур, цанчирча на муначIа дуклай ивкIун тIий. Ттун оьрмулуву хъунма­сса тIайлабацIу хьуссар Альберт Хаджаев хьунаакьаврийну, ттун ва кIулли 70-ку шиннардия шинай. Ванал жухь, живописьрал, композициялул гьанурдал дакъассагу, дирхьу­ссар тIайлашиврул, лайкьшиврул дарсругу.

Мунал дирхьусса ми дарсирдайн бувнугу бюхъай на, художник къавхьуну, журналистнал пиша язи бувгьуну бикIангу. Амма цIанакул выставкалийсса цинярдагу давур­тту ххал дувайхту, бувчIунни ттуна му сайки къакIулну ивкIшиву, муксса гьунар бусса, цимивагу чулухунай итххявхсса инсан, щихачIав къалавхьхьусса художник ур ва. Яла-яла ванал портретру – ми анжагъ суратру дакъар, ми хъанай дур щаллу­сса тарихрал лажинтру, драматургия, конфликт, ми суратир­ттах личIлулну буругарча, цикссагу затру буслай бур миннул. ЧIа тIий ура ттула учительнан цIу-цIусса тIитIалартту, — тIий ур Алик АьбдулхIамидов.

— Альбертлул давурттащал на хьхьичIва-хьхьичI кIул хьуссара Культуралул министерствалуву, Бадрижат Набиевнал кабинетраву, ванияр цикссагу шиннардил хьхьичI. Му дия бархъарадушнил сурат. Ттуйн яла-яла асар биян бувна му душнил дакIнил куртIшиврул, мунил марцIшиврул, ттюнгъашиврул, щугълурдал.

Муния махъ кIул хьура мунал натюрмортирттащал, пейзажирттащал. Укунсса манералул художник жучIава Дагъусттаннай цама ушиву къакIулли. Дазу да­къасса барчаллагьрай буссара мунан ттулла суратрахлу, му ттучIа шарда дикIайссар, выставкарду ду­сса чIумал, дуккан дувайссар. ХIакьину кунма зал бувцIусса выставкарду чIяруну къашай жучIара, ванилгу бусласиссар инсантуран Альберт цуксса ххирассарив, — тIий бия Тарият Къапиева.

Ва выставка хIадур давриву хъунмасса захIмат бивхьуну бия Альбертлул душнил, выставкалул куратортуравасса цану хъана­хъисса Мадина Хаджаевал.
Ва дия, мяйжаннугу, Тарият Къапиевал увкусса куццуй, искусствалул карнавал, магьирлугъ ххираминнал, мунил кьадру буминнал байран.