Нажмуттиннул душ Щурпаева Миясат

Цаппара хIаллай къашавай шанийгу бивкIун, оьрмулул 81 шинаву жуятува батIул хьунни гьунар ххисса шаэр, чичу, пуб­лицист, хьхьичIунсса педагог, Гъази-Гъумучиял шяравату­сса Нажмуттиннул ва Муккурдал шяраватусса ПатIиматлул душ Щурпаева Миясат.

[dropcap]М[/dropcap]иясат бувну бур июль зурул 25-нний 1937-кусса шинал Гъумук. 1955-ку шинал Гъумучиял дянивмур даражалул школагу къуртал бувну, бувххун бур Дагъусттаннал паччахIлугърал университет­равун – оьрус мазрал ва литературалул факультетрайн. Му къуртал бувну махъ зий бивкIун бур корреспондентну «Дагестанская правда» кказит­рай. Муния мукьах Миясатлул цила оьрмулул биялсса бутIа харж бувссар педагогнал пишалун, МахIачкъалаллал 8-мур школалий оьрчIахь дарсру дихьлай.

Цуппа гьунар лавай­сса шаэр бушиву Миясатлул чIалачIи бувссар чIавану бунува. Ванил цалчинсса шеърирду бивщуссар 1953-ку шинал «ЦIусса ххуллу» тIисса Лакрал райондалул кказитрай, 1954-ку шинал ванил назмурду дуркссар «Дусшиву» альманахрай. Цалчинсса шеърирдал жуж бивщуссар 1979-ку шинал. Муния мукьах Миясат Щурпаевал кIунттила бувк­ссар дунияллийн ацIвахъул поэзиялул ва прозалул лу­ттирду.
1995-ку шинал ванин дуллу­ссар «Дагъусттан Рес­пуб­ликалул культуралул лайкь хьусса зузала» тIисса бусрав­сса цIа. ХIалал дур­ссар чIярусса хIурматрал грамотартту ва бахшишру.

Миясат жуятува личIи шаврил хъуннасса пашманшивугу кIидачIлай, дакIнихтунусса жижара буллай буру ванил щалагу агьлу-авладрахь, гъан-маччаминнахь, ванил поэзиягу, прозагу ххира хьусса цинявппагу буккултрахь.
Цил бунагьирттал аьпа баннав, рухI рахIатний дишиннав!

Гъумучиял
ва Муккурдал жямат