Жижара

ХIусманнул арс ХIусманов Аслан

[dropcap]В[/dropcap]ай гьантрай, азардануща хха­ссал къавхьуну, лавгунни дунияллия 1-мур ЦIувкIратусса захIматрал ветеран,Дагъусттаннал лайкь хьу­сса экономист, ЦIувкIуллал колхозрай хъунама бухгалтерну зий мукьцIалунниха лирчусса шинну дурсса, бусравну оьрму бувтсса, ХIусманнул арс ХIусманов Аслан.


Увссар ва 1939 шинал ЦIувкIрав. ЧIяйннал школа къуртал бувну махъ дуклан увхссар цал бухгалтер шайсса курсирдайн, яла – техникумравун. Зий ивкIссар шяраваллил советрал председательнугу.

Цала кIулшивурттайхчIин, захIматрайхчIин Асланнул чIярусса давурттив дурссар колхозрал кутак цIакь дуван, хъун дан, колхозниктурал маэшат ххуй бан. Шяраваллил агьалинал дянив Асланнул хIурмат-кьимат лавайссия. Му мудангу хIала уххайва жяматрал иширттавух, тамансса шиннардий зий уссия шяраваллил Советрал депутатну, парторганизациялул секретарьну ва мукуна цаймигу жяматийсса давуртту дуллай.

Ва ия жяматращал хIал бавкьусса, хасият иминсса зунтталчу.
Аслан дунияллия лагаврил кьурчIишивугу кIидачIлай, жижара буллай буру кулпатрахь, арсурваврахь, душваврахь, миннал наслулухь ва цинявппагу гъан-маччацириннахь.
Имандалий лавгун лякъиннав, алжаннул ххари уваннав.

1-мур ЦIувкIуллал жямат

Муртал душ Агъаева ПатIимат

Март зурул 11-нний 86 шин хьунтIиссия октябрьданий дунияллия лавгсса 1-мур ЦIувкIратусса ххаллилсса хъамитайпалун, захIматрал ветераннан, Муртал душ Агъаева ПатIиматлун (Багал ПатIан).

Ванил захIматрал оьрму байбивхьуссар ЦIувкIуллал колхозравусса даврий зий. 1964 шинал вайннал кулпат Ваччав бивзссар, ПатIимат цал заготскотрал кассирну, яла ветлабораториялул кассирну зий бивкIссар. Оьрмулул 70 шин хьуннин бувсса захIматрахлу лайкь хьуссар ХIурматрал грамотарттан ва бахшиширттан.

Багал ва ПатIиматлул ужагърай ЦIувкIратусса ва цаймигу шяраваллавасса хъамал тачIав чан къашай­ссия, щалагу Ккуллал райондалул агьалинан ххуйну кIулсса ва бусравсса кулпатри.

АцIва оьрчI ччаннай бацIан бувсса Нину-Виричу ПатIиматлул цилами оьрчIалссагу, хъамаллуралссагу бувайссия, дакI тIиртIусса, аьчухсса инсан буссия. Жяматран ххирассия.
Махъсса шиннардий ПатIимат Санкт-Петербурграйн бивзссия, тийх яхъанай бухьувкун эбратранну хъуни бувсса арсру, душру ва миннал наслу.

ПатIимат дунияллия лагаврил кьурчIишиву кIидачIлай, жижара буллай буру ванил арсурваврахь, душваврахь ва миннал наслулухь, махъсса цинявппагу гъан-маччацириннахь.
Цил бунагьирттал аьпа баннав, рухI хъинний дишиннав.

1-мур ЦIувкIуллал
ва Ваччиял жямат

Ибрагьиннул арс Хизриев Гулбар

ЗахIматсса къашайшивруща ххассал хьун къавхьуну, жуятува лавгунни яхI-къириятрал заллу, хъиншиврул бутIа ххишалану буллусса уздансса чув, дакI-аьмал авадансса инсан, Ибрагьиннул арс Хизриев Гулбар.

Увну ур Гулбар 1985-ку шинал Хъювхъиял шяраву. Школагу къуртал бувну, 2002-ку шинал дуклан увххун ур ххуллул институтравун. Мугу къуртал бувну, лавгун ур аьралуннаву къуллугъ бан. Муния махъгу дуклан увххун, мунал ларсун дур юристнал кIулшиву. Зий ивкIун ур Гъумук милицанал отделданий.
Чув, ссаха зий унугу, Гулбардул ккаккан бувссар цува хъинну дакI тIайласса, бюхъу бусса инсан ушиву. Му хъинну бусравсса ия шяравусса агьалинангу, даврил уртакьтурангу, дустуран-гьал­махтурангу.
ХIайп, лавгунни, чIун да­къана, ххаллилсса кулпатрал заллу, хъинсса ппу, вихшаласса дус, ххаллил­сса арс. Махъ кьабивтунни чIавасса кулпат лякьлувусса оьрчIащал, кIива мюрщисса душ, нину. Цалва чIивисса мутталийсса оьрму Гулбардул бувтссар марцIну, чил аьй къаданну.
Гулбардул нязаннивсса бивкIу­лул кьурчIишиву кIидачIлай, жижара буллай буру кулпатрахь, душварахь, гъан-маччанахь, агьлу-авладрахь.
Цал гьав нурданул дуцIиннав, алжан нясив баннав. Ванан ба­къамур ванал душваран, махънан булуннав.

Хъювхъиял жямат

Юсуплул арс Рамазанов МахIаммад

Март зурул12-нний оьрмулул 85 шинаву Нальчик шагьрулий жуятува лавгунни ххаллилсса лаккучу Рамазанов МахIаммад Юсуплул арс.

МахIаммад увну ур 1933 шинал Уриннал шяраву. Гъумук ацIва классгу бувккуну, Ттуплислив къуртал бувссар физкультуралул институт.
Цаппара шиннардий Гъумукгу зий ивкIун, лавгун ур Къабардин-Балкьарнавун. Махъсса шиннардий, пенсиялийн укканцIа, зий ­уссия Ухссавнил Ккавкказуллал альпинизмалул ва туризмалул управлениялул хъунаману.
ДакIнихтуну бивхьусса захI­матрахлу МахIаммад лайкь хьуссар «Трудовой славы» ордендалун, захIматрал ветеран, спортрал мастер цIардан ва чIярусса бахшиширттан.
МахIаммад уссия дакI тIир­тIусса, аьмал хъинсса, жяматравугу бусравсса, лак ххирасса инсан.
Цибанссар, гъурбатрай паракьат хьун багьунни.
МахIаммад ахиратрал шаврил кьурчIишиву кIидачIлай, жижара буллай буру кулпатрахь, ссихь, арснал оьрчIахь ва махъсса щалагу агьлу-авладрахь.
Имандалий лавгун лякъиннав, бунагьирттал аьпа баннав, алжаннул ххари аннав. Махънал оьрмурдай барачат бишиннав. Амин.

Уриннал
ва БахIикIуллал жямат

Кьурбаннул арс Сайдуев ХIабибуллагь

Оьрмулул 75 шинаву дунияллия лавгунни захIматрал ветеран, 1-мур ЦIувкIратусса Сайдуев Кьурбаннул ва ПатIиматлул арс ХIабибуллагь. ЦIувкIрав увсса, хъуна хьусса ХIабибуллагьлул дянивмур даражалул школа къуртал бувну бур ЧIяв.

Шанна шинайсса аьрали буржгу бартбивгьуну, Дянивмур Азиянаву зий ивкIун ур. Шавай зана шайхту, бувцуну бур Ккуллал шяраватусса Мамайл ва Загьидатлул душ Гуннарижат. Цаппара шиннардий зий ивкIун ур Ваччав Госбанкрал бухгалтерну. 1969 шиная шихунай МахIачкъалаливсса Сепараторду бай заводрай фрезеровщикну зий ивкIун ур, завод лакьиннин. ХIабибуллагь ия цала пиша ххуйну кIулсса, захIмат ххирасса, даву лажин кIялану дувай­сса зузала. Лайкь хьуну ур таман­сса хIурматрал грамотарттан ва медальлан. Цувагу инсантуращал хIал бавкьусса, дакI тIиртIусса, хасият ххуйсса адамина уссия, хъамал, бухху-букку ххирассия. ХIабибуллагьлул ва Гуннарижатлул, лайкьсса тарбиягу дуллуну, чивун буккан бувссар арс МахIмуд ва душру Суджана ва Светлана.
ХIабибуллагьлул бивкIулул кьурчIишиву кIидачIлай буру ванал кулпатрахь, арснахь, душваврахь, уссихь, ссихь ва махъсса цинявппагу гъан-маччацириннахь. ХIабибуллагьлул аьпа баннав, рухI алжаннаву дишиннав, гьав нурданул дуцIиннав, ванан бакъамур оьрму наслулун булуннав.

1-мур ЦIувкIуллал
ва Ккуллал жямат

Аьвдуллагьлул душ Оьмарова КьурбанпатIимат
Март зурул 8-нний жуятува лавгунни хIакьсса зунттал душ, дяъвилул ветеран, Оьмарова КьурбанпатIимат Аьвдуллагьлул душ.

КьурбанпатIимат бувну бур 1927 шинал Лакрал райондалийсса Хьурттал шяраву Башанахъал Аьвдуллагьлул ва Аьжал кулпатраву. 1941 шинал ванил ппу лавгссар Ватан душмантурая дуруччин. Къатлуву хъунма-хъунмур, ххюва оьрчIал дянива 14 шинавусса КьурбанпатIимат бувцуссар къанавртту дуклан Ленинккантуллал чуллайн. Тамансса ккаши-мякьгу ккавккун, захIматгу бувхIуну, ванин цукун-бунугу цила шяравунмай зана хьун нясив хьуну бур.

Гания махъ Кьурбан­патIи­матлул хъунмасса захIмат бивхьуссар колхозраву зийгу, ичIу­вагу, цила ниттицIун мюрщими оьрчIру ччаннай бацIан бан кумаг буллай.
Ппу зана къавхьуну ур дяъвилия. Дяъви къуртал хьуну махъ, ниттин оьрчIру хъуни бан кумаг баву мурадрай, лавгун бур КьурбанпатIимат Щурагьун личIи-личIисса давурттай зун. 1949 шинал Щурагь щар хьуну бур ЧIяйннал шяравасса дяъвилул гьурттучи Оьмаров Абакардун.

ЧIяйннал шяравугу ва цинявннан бусравну ва хIурмат-кьиматрай ялапар хъанай бивкIссар. Ва бия ххуйсса пишалул заллу – дарзий. Чансса буссар гай захIматсса шиннардий ванил янна къадурурххусса инсантал. Ва зий буссия райондалул бытовой обслуживаниялул комбинатрай, муния махъ, пенсиялийн букканнин, зий буссия райондалул ясли-садрай. Цуппа зузисса давурттай ванил цилла цIа бусраврай ядурссар.

ДакIнихтуну бивхьусса захI­матрахлу дуллуссар ванин хIурматрал грамотарду, барчаллагьрал чагъарду.
Цуппа дунияллия гьан цаппара зурдардил хьхьичI ваничIан бувкIссар 90 шин шаврин хасну Аьрасатнал Президентнал чулухасса барчаллагьрал чагъар.
КьурбанпатIимат бия Аллагьнайн вихсса, имандалийсса оьрму бутлатисса инсан.

Хъуннасса кьурчIишиву кIидачIлай, жижара буллай буру ванил оьрчIахь, душваврахь, гъан-маччанахь.
Ваксса къавхьуну жуятува яла гьансса къахьуннав. Махъминнахьхьун цIуллушиву дулуннав.

ЧIяйннал ва Хьурттал
жяматрал цIания
ТIалхIат АьвдурахIманов

Хъуннасса кьурчIишиву кIидачIлай, жижара буллай буру «Илчи» кказитрал муданасса дус АьбдурахIман Адамовлухь, ванал

уссил Оьмарил арс Арсен
нязаннив оьрмулуцIа шаврийн бувну.
РухI алжаннул ххари даннав, имандалий лавгун лякъиннав.
«Илчи» кказитрал редакция

Хъуннасса кьурчIишиву кIидачIлай, дакIнихтунусса жижара буллай буру АьбдурахIман Адамовлухь, ванал ххирасса

уссил Оьмарил арс Арсен
чIун дакъа аьпалувух ишаврийн бувну.
Цал гьав нурданул дуцIиннав, алжаннул ххари аннав, махъминнал оьрмурдай барачат бишиннав.
Дустал Заурбаг, МахIач, МахIаммад