МахIаммадлул арс Юнусов ХIажимурад
[dropcap]З[/dropcap]ахIматсса цIуцIаврища ххассал ан къавхьуну, мартрал 18-нний, оьрмулул 78 шинаву къуртал хьунни ххаллилсса зунттал чув, гьартасса дакIнил ва кIулшиврул заллу,гьунар бусса, итххявхсса инженер-технолог, МахIаммадлул арс Юнусов ХIажимурад.
ХIажимурад увну ур 1940-кусса шинал Цалчинмур ЦIувкIрав Юнусов МахIаммадлул ва ПатIиматлул кулпатраву. 1958-кусса шинал къуртал бувну ЧIяйннал дянивмур даражалул школагу, кIира шин дурну дур МахIачкъалаллал консервардал комбинатрай зий. 1961-кусса шинал увххун ур Дагъусттаннал хIукуматрал университетравун, къуртал бувну мунил технологиялул факультетгу, лавхьхьуну бур инженер-технологнал пиша.
Мура шинал тIайла увккун ур Белиджиллал консерварду дайсса заводрайн. Микку зий ивкIун ур 1969-кусса шинайнин, заводрал лабораториялул хъунаману.
1969-кусса шинал ивзун Дарбантлив, 1980-кусса шинайн ияннин зий ивкIун ур цIуну буллалисса пивзаводрал хъунама инженерну. Муния махъ, пенсиялийн укканнин, зий ивкIун ур Ухссавнил Дагъусттаннай личIи-личIисса дуки-хIачIия итадакьайсса производствалул предприятиярттай: Къаяккантуллал сокрал цехрал хъунаману, Первомайскаллал сельхозкоопзаготпромрал директорну ва цаймигу личIи-личIисса давурттай.
Пенсиялийн увккун мукьах ХIажимурад ивзун ур МахIачкъалалив.
ХIажимурадлул ва ванал кулпатрал Зумрудлул хъуни бувну, ларайсса кIулшивурттугу ласун бувну, цала-цала къатрай бивтун бур арсгу, шанма душгу.
ХIажимурад ия хIалимсса, гъан-маччанал, жяматрал дянив хъинну бусравсса, миннал чIарав ацIлацIисса инсан.
КьурчIишиву кIидачIлай, жижара буллай буру кулпатрахь Зумрудлухь, арснахь МахIаммадлухь, душварахь Иринахь, ПатIиматлухь, Марияннухь, ссихь СултIанатлухь, уссихь Кьурбаннухь, куявтурахь ва цинявппагу гъан-маччаминнахь.
ХIажимурадлул рухI алжаннаву дишиннав. Ванан къабуллусса оьрму махъминнан булуннав!
Цалчинмур
ЦIувкIуллал жямат
Минкаиллул душ МахIаммадова Жамисат
[dropcap]М[/dropcap]артрал байбихьулий, мадара хIаллай къашавайгу бивкIун, аьпалухьхьун лавгунни Минкаиллул душ МахIаммадова Жамисат, цума-цаннащалгу хIал бавкьусса, дакIнил хъиншиврул бутIа аваданну буллусса хъамитайпа.
Жамисат бувну бур 1934 шинал ГьунчIукьатIрал шяраву, къуллугъчинал кулпатраву. ЧIивину буна нинугу ялату ларгун, ванин чIавасса оьрмулий ичIаллил давурттал гьиву цийнна ласун багьну бур. ГьунчIукьатIув 7 класс бувккуну махъ цаппара шиннардий колхозраву зий бивкIун бур. 1963 шинал бувххун, 1967 шинал медициналул техникум къуртал бувну бур. Зий бивкIун бур МахIачкъалалив цалчинсса аптекалий. Пенсиялийн бувккун махъгу гиккува зий бия.
Ванил ва ласнал Расуллул дянив ца душ бур. Жамисатлул, цила душгу хъунма бувну, чивун буккан бувунни. Жамисатлул хIурмат, ца ГьунчIукьатIрал жяматраву бакъассагу, гьарцагу му кIулначIа хъинну лавайсса бия.
Ци банссар, Аллагьу Тааьланал чичру мукунсса духьунссия.
Жамисатлул бивкIулул кьурчIишиву кIидачIлай, жижара буллай буру ванил душнихь Ххадижатлухь, куявнахь Салимлухь, ссихь, ссурахъаврахь, цинявппагу гъан-маччаминнахь. Цил бунагьирттал аьпа баннав, рухI хъинний дишиннав. Алжаннул ххари баннав.
ГьунчIукьатIрал жямат
Алхаслул арс Аьмаев МахIаммада
[dropcap]В[/dropcap]ай гьантрай, цала кулпатгу, оьрчIругу хъирив хъапатIи бувну, ахиратравун лавгунни КIямашрал шяравасса ххаллилсса чув-адамина, дакI-аьмал авадансса инсан, Аьмаев МахIаммада Алхаслул арс.
МахIаммада увну ур КIямашрал шяраву 1930-ку шинал. ЧIаравсса ГьунчIукьатIрал шяраву арулва классгу бувккуну, увххун ур МахIачкъалалив шупиртал шай курсирдайн, гайгу къуртал бувну, лавгун ур Омск шагьрулийн буттауссичIан. Тихава армиялийнгу лавгун ур. Армиялия увкIун махъ таксопаркраву таксистну 40 шинай зий ивкIун ур МахIачкъалалив. 2010-ку шиналнин икIайссия МахIаммада му даврий.
Яла, яруннин чани чанну буну, таксигу кьабивтун, дахху-ласулул дунияллий цала маэшатралсса буллай икIайва. Шяраваллийн, жяматрайн, лакрайн багьайсса гьарцагу иширавух МахIаммада мудангу чялишну хIала уххайссия. «Илчи» кказитрал хьхьичIунсса подписчикгуя. Чичайссия цаллагу чIа-чIаннин макьалартту, хIала уххайссия маслихIатрал макьаларттавухгу.
МахIаммадал бивкIулул кьурчIишиву кIидачIлай, жижара буллай буру ванал кулпатрахь Аьйшахь, арснахь Камаллухь, душваврахь Дианахь ва Зулфияхь, вайнная бивзминнахь ва щалвагу Аьмахъал тухумрал гъан-маччаминнахь. Махъминнал оьрмурдай барачат бишиннав. МахIаммадагу алжаннул ххари аннав.
КIямашрал жяматралгу, кIулминналгу чулуха
Гъазиева Бахттун
Янил жавгьар кунма, ябувсса пиша
ХIасан-ХIусайн зий ивкIссар личIи-личIисса колхозрал давурттай. ЧIяйннал шяраву 10 класс къуртал бувну махъ ванал бувккуссар Дарбантуллал культпросветучилище.
ХIасан-ХIусайннун буттал лажин ккарккун дакъар. Дяъвилул шиннардий, личIи-личIисса сававртту багьана хьуну, ливтIуну бур уссу-ссурвалгу. ЛивчIун ур цувалу. АцIния арулла шинал оьрмулуву бувну бур кулпат.
Ца шинавату вагу цуппалу кьабивтун, лавгун ур армиялийн аьралуннаву къуллугъ буллан. Шанна шин ва дачIи дурну дур къуллугъ буллай.
Цала бувгьусса пиша, янил жавгьар кунма, ябувссар ХIасан-ХIусайннул. Ва ия культуралун куну ниттил увсса инсан. Ва ия къавтIала, балайчи, къутри личу, дачIучи, мандолина бищу.1957-ку шинал МахIачкъалалив хьусса Дагъусттаннал фольклорданул фестивальданий, 15 ххаржандалущалсса къавтIаву дурну, ХIасан-ХIусайннун буллуссар 1-мур кIану.
Ва гиччава уцлай ивкIссар «Лезгинка» ансамбльданувун. Нину ва кулпат рязи къавхьуну, къалавгун ур. Амма га чIумалсса Гъумуксса Лакрал театрданувун увцуну ур Минкаил Аьлиевлул. Гикку зий цаппара шиннардива Ккуллал райондалий Культуралул къатта тIивтIукун, райондалул хъуниминнал директорну зун увцуну ур. Гикку зий дурну дур арулла шин. Яла буттал шяраву Культуралул къатта тIитIайхту, кIиккун директорну зун лавгун ур. ХIасан-ХIусайн кIикку зий ивкIссар оьрмулул 70 шин хьуннин.
ХIасан-ХIусайн лайкь хьуссар чIярусса личIи-личIисса хIурматрал грамотарттан, медаллан, фестиваллал дипломирттан ва арцуйнусса бахшиширттан.
ЦIувкIуллал жяматран кIулссия, культуралул зузалану акъассагу, ва гъайтIала, цулуцала, тIаннул усттар, буттукьри буву ушивугу.
Гьарица жалиндалун буттукьа байссия, наврузбаг ва жалин барча бан цала бувсса шанмардай балай учайссия. Ваная увайва гьарицагу хъатIий «министр культуры». Шяравусса душваран къавтIун, оьрчIан музыка бищун лахьхьин бувссар ванал.
ХIасан-ХIусайн ия кулпатран ххаллилсса ласгу, оьрчIан дакI-аьмал ххуйсса ппугу. Ванал, цала кулпатращал, хъуни бувну, дуккин бувну, къатрай бивтссар арулва оьрчI-душ.
ХIасан-ХIусайннул дакI-аьмал ххуйсса симан жул, культуралул зузалтрал, дакIния тачIавгу къагьантIиссар.
Аьишат Оьмариева,
Ваччиял культуралул
къатлул директор
