[dropcap]М[/dropcap]артрал 17-нний Каспийскалий хьунни Аьрасатнал футболданул чемпионатрал МахIачкъалаллал «Анжи» ва «Тосно» командарттал дянивсса тIуркIу. Чемпионатрал сияхIрал лувми ххуттардия ялун личиншиврул «Анжи» командалун багьлай бия чара бакъа ххув хьун.
Руслан Къардашов
[dropcap]В[/dropcap]а кьини «Анжи» командалул сияхIрай ия хьхьичIмур тIуркIулий гьуртту къавхьусса мукьа футболист: Тетрашвили, Бурдаков, Будковский ва Хамданов.
ТIуркIулул бакIрайва «Анжи» байбивхьунни муттаэтурал чулухунмай гьужум буллай. 17 минутIрай Хубуловлуя биривсса ттуп жула футболист Антоннул штрафнойлул ххуттая бивщуну гьан бунни «Тоснолул» къапулувун. Гол! Цалчинмур таймрал ахир дучIавайсса чIумал, гава Антоннул, гава ххуттая, утти Данченкол дуллусса пасрая, ттуп запI учин бувунни муттаэтурал къапулувун. Гол!
КIилчинмур таймрай «Тосно» командалул, цаппарава футболисталгу баххана бувну, бюхъаймур буллай дия бухшаврил аьш къаласун. «Анжилущагу» хьунни, хъит-щит къатIий, цала биялалий тIуркIулул дайлитIу хьунадакьин. Ахиргу 2:0 счетрайну ва тIуркIу къуртал хьунни.
Пресс-конференциялий «Анжи» командалул хъунама тренер Вадим Скрипченкол увкунни: «КIирагу командалул ххув хьунсса мурад бушиву ккаккан бунни. Барчаллагь жула футболистурайн, ххувшаву ласун хIарачат бувсса, ва стадиондалийн жул чIарав бацIан бувксса тамашачитурайн».
Шиккува кIицI бан, утти «Илчи» кказитгу хьуссар «Анжи» командалул информациялул спонсор.
«Анжилул» хъиривмур тIуркIу хьунтIиссар апрельданул 1-нний Краснодар шагьрулий «Краснодар» командалущал.
«Анжи» — «Тосно» — 2:0
Голлу: Антон, 17 (1:0), Антон, 43 (2:0).
«Анжи»: Будаков, Данченко, Самарджич, Брызгалов, Полуяхтов, Хубулов (Прудников, 86), Тетрашвили, Антон, Лескано (Калмыков, 76) Хамдамов (Бакаев, 71), Будковский.
«Тосно»: Юрченко, Буйволов, Маргасов (Нуну Роша, 73), Чернов, Дучалич, Жигулев, Галиулин, Рикардиньо, Труич (Макаров, 46), Полетанович, Погребняк (Мелкадзе, 53).
