Ина бувгьусса гьаннарал мархри

Ттун чIалачIиссаксса, ттущала архIал дуклай бивкIминнан Гъумучиял дянивмур даражалул школалий хъунмасса тIайлабацIу хьуну бур учительтурал чулуха.
Директорну ия Чалабов Ибрагьин Исмяилович, учительтал: Маммаев Нураттин МахIаммадович, Къажлаев Расул Камилович, Шахшаев АхIмад Камилович, Парамазова Эльза Алексеевна, Кканккаева Шамай Абаевна, Багъдуева Алла Ивановна ва цаймигу.


Ибрагьин Исмяилович ва Нураттин МахIаммадович бия ттул шяравучутал. Ттул минная хъунмасса пахру бикIайва. Ми цив­ппагу бия хъинну чурххал исвагьисса, бюхттулсса, гьайват дусса, аькьлу-кIулшилул бувччусса, цалла дишайсса элмурдал профессионалтал.
Ттухь Ибрагьин Исмяиловичлул дарс къадирхьуссар, амма ттун кIулли, жула хъуниминнал буслай, му ивкIшиву чIивинийва хъинну итххявхсса, зирангсса, ка усттарсса.

Нураттин МахIаммадовичлул ттухь 9-10-ми классирттаву дирхьу­ссар математикалул дарсру. Лакрал жяматрал мунайн учайва «Лакрал Ломоносов» куну, ЯтIул дипломращал къуртал бувну тIий Москавуллал Ломоносовлул цIанийсса университет. Учительнал гьунар мунан буллуну бия цилва тIабиаьтралва.
Нураттин МахIаммадовичлул дарс дирхьуминнава биялсса инсантал хъуни-хъунисса къуллу­гъирттай зий бур, хьхьичIунсса аьлим­тал хьуну бур.

ХIакьинусса кьинигу дакIнийн утлай, мунал дуклаки оьрчIахсса ччаврияту буслай, бусан къахъанай бикIай ми. Буслан бикIай мунал буллай ивкIсса мяъна куртIсса хъярчирдая. Жул жяматрал гьарца иширавух чялишну гьуртту шайва цувагу. Мунал бивщусса мандолиналул чIу ляличIинува бавкьу­сса бикIайва.

Цума-цаннангу итабакьай Заннал цанмасса оьрмулул бутIа, цува ляхъан увсса аьрщарай лахъину-кутIану бутансса чIумул мутта. Амма Нураттин МахIаммадовичлун Заннал къабуллуну бия мутта лахъину оьрму бутансса.

Жула лакрал миллатрал дянивату чансса бивзун бакъар цала пагьму-гьунарданийну, къучагъсса захIматрайну цалла цIа тарихраву чирчусса, хъамакъаритансса аьшру кьадиртсса чиваркI. Миннавух чара бакъа буссар Ибрагьин Исмяилович ва Нураттин МахIаммадовичгу.

Малик Гъапуров,
ш. Читтур