Дагъусттаннал Виваллил иширттал министерствалий хьунни 8-мур Мартрал байрандалун хас бувсса шадлугърал мажлис.

Андриана Аьбдуллаева
Шикку гьуртту хьунни ДР-лул виваллил иширттал министр, полициялул генерал-лейтенант Аьвдурашид МахIаммадов, ванал хъиривчу полициялул генерал-майор Сергей Карпов, Силистталул управлениялул хъунама, юстициялул полковник Михаил Зеленский, зузалт­ращалсса даврил управлениялул хъунама, виваллил службалул полковник Сахават Сахаватов ва личIи-личIисса подразделениярттал каялувчитал.
Мажлис тIитIлай, хъами байрандалущал барча бунни Аьвдурашид МахIаммадовлул.

— Интнил цалчинсса байран хъаннин хас дурсса душиврувугу цила тIилисин бухьун­ссар. Дуниял хъаннил чIюлу дуллай дур, минная мудангу чани ва гъилишиву най дур. Дунияллий дакьаву ва паракьатшиву дуру­ччингу хъаннил бияла хъунма­сса бур. Цала давривугу ми ххишалану жаваблувсса бур.

Виваллил иширттал министерствалун хъунмасса пахру буссар жула структуралуву зий бигьа д­къасса хъар лархъун нанисса ва захIматсса къуллугърал буржру лайкьну бартбигьлагьи­сса хъанния, — увкунни Аьвдурашид МахIаммадовлул.

Ванал ихтилат къуртал хьуну махъ, давриву хьхьичIунсса хъаннин дуллунни ведомствалул чулухасса наградартту ва хIур­матрал грамотарду. Министрнал бахшишру дунни мукунна личIи-личIисса спортрал бяст-ччаллаву хьхьичIунсса кIанттурду бувгьу­сса ва министерствалул цIа лайкьну дуручлачисса душваран.

Виваллил иширттал органнаву зузисса хъами барча бан бувкIун бия Дагъусттаннал лайкь хьу­сса артистътал Зайнаб Махаева, Кристина, Рукьият ХIамзатова, Рашид Багатаев, мукунна дунияллийх цIа машгьур хьусса «Лезгинка» ансамбль.

Виваллил иширттал министерствалул бахшишру дунни цалла байран лахъа-хъун дан бувкIсса циняв­ппагу артистътуран. «Лезгинка» ансамбльданул каялувчи Жамбулат МахIаммадовлул дакIнихтуну барчаллагь увкунни халкьуннал мюхчаншиврул къаралданий бавцIусса органнал зузалтрахь ва виваллил иширттал министр Аьвдурашид МахIаммадовлухь.