[dropcap]М[/dropcap]артрал 21-нний «Дагестан» РИА-лий Росгвардиялул Да­гъусттан Республикалийсса управлениялул хъунама, генерал-майор МахIаммад Баачиловлущалсса пресс-конференция хьунни.

---

З. АьбдурахIманова
ХIакьинусса кьини респуб­ликалийсса Росгвардиялул ведомство сакин шаврия буслай, генерал-майорнал кIицI бувунни, билаятрал бакIчинал хIукмулийн бувну, шивун багьлагьисса ОМОН, СОБР ва хасъсса авиациялул кьюкьа буржлув дурну душиву цачIу аьрали къуллугъ лахълан.

— Жуя тIалавну буссия, ва шинал дайдихьулийн управление сакин бувну, ца чулухун багьан. Амма, цаппара харж-хуржлицIун бавхIусса масъалартту ттигу дузал къавхьуну тIий, щаллу хьун бувару. Ма­съала щаллу шаврищал, Росгвардиялул шамилчинсса ятIапгу къуртал хьушиврун ккалли дан бучIиссар.

Мукунма ванал кIицI лавгунни ведомствалул хьхьичI бивхьуну бушиву ца яла агьам­сса мурадгу – чIал къархьуну республикалий хьунтIисса лачIунбуккултрал Европанал чемпионатрай мюхчаншиву дуруччин ва цивппа хIадурну бушиву ялув бивхьусса аьрали буржру биттур бан.

МВД-лул ттигу цаппара кьюкьри Росгвардиялийн тапшур дувантIиссар тIисса хаварду тIайлассарив тIисса суалданун, ванал бувсунни МВД-лул цурда-ца ведомство вания гихуннай цал каялувшиврулун къадагьантIишиву.

— Ларгмур шиналва буссия ЦПЭ ва Госзащиталул центр жухьхьун булун бюхъай­ссар тIисса хаварду. Ца пресс-кон­ференциялий главкомрал цалчинма хъиривчу, генерал-пол­ковник Сергей Меликовлул ми хаварду кьукьинсса дазу дирхьуссия. ЦIана жуйн дагьайсса ведомствартту дакъа, ххишаласса цичIав жухь къадикIантIиссар.

М. Баачиловлул мукунма бувсунни республикалул Росгвардиялул гужру щилкIуй каялувшиврулу бакъашиву, так главкомрал бакъа.
— Жу буржлувссару Республикалул БакIчинал амрурду щаллу буллан. Масалдаран, вай гьантрай, Лаващиял райондалий цаннайн ца данди дурксса кIира щарнил дянив биявуртту къахьуншиврул, Владимир Васильевлул амрулий жул аьраллу бивкIссар кIихун бивчуну. Жуйн къадагьайссар силистта бачин баврил давуртту, так мюхчаншиву дуруччинмурди бан буржлувсса, — бувсунни генерал-майорнал.

Цала жавабирттаву М. Баачиловлул мукунма кIицI лавгунни Росгвардиялул аьралуннал янна-ус, формагу цалсса ттинин диркIмур душиву, так чан-кьансса дахханашивуртту ххи дуршиву.

КIицI бувунни Ухссавнил Ккавкказнаву жулламур рес­публикалул ОМОН-далул ва СОБР-данул кьюкьри ца яла гужминнун, хьхьичIунминнун ккаллишиву.

— Жуллами кьюкьрал дур­сса мероприятиярттал ва аьрали операциярттал кунна хъунна­сса сияхI цурда-ца региондалий дакъар. Жул подразделенияр­ттал опыт хъинну хъунмасса бур, халкь бавтIсса кIанттурдай мюхчаншиву дуруччаврия тIайла хьуну, аьрали спецоперацияр­ттайн бияннин. Республикалий бакъа, мунил кьатIувгу вайннаща лайкьну кьини духIан бюхъантIиссар, — увкунни ванал.

М. Баачиловлул ххи бувунни цIанасса чIумал ведомствалий зунсса пишакартал биял къахъанахъисса ишру бакъашиву.
— Ттун хъинну бувчIлай бур инсантал, давуртту дакъа, жучIа зун ччай бушиву. БучIаймигу хъинну духIин дусса, ххуй­сса кIулшивуртту дусса ва аьрали буржгу лавхъсса бучIай. Бу­чIарчагу, хIакьинусса кьини Росгвардиялул ведомство зузалтрал чулуха 93% щаллуну бур.

Гьарца ялун кьамул аймагу Пятигорскалийсса СКФО-рал округрайхчIин, МВД-лул ва ФСБ-лул спецучетрайхчIин кьамул увайссар. Вай ливчIсса 7% мува куццуй дузал буллай бу­ссар, — кIицI бувунни ванал.
Бувсунни Европанал чемпионат наниссаксса хIаллай республикалий ярагъ баххаврил, машан ласаврил ялув хъинну бавцIуну бикIантIишиву, хIа­сил, ярагъ баххай ттучанная чемпионат наниссаксса хIаллайсса тIалавшиннарду гужлан дантIишиву.

Ванал ялагу бувсунни март­рал 27-нний Росгвардиялун 2 шин хъанахъишиву, му кьини Каспийскалий цал ведомствалул пишакартурал хъамаллуран­сса, хаснува дуклаки оьрчIансса, ххуйсса программа хIадур дурну душиву.