Асгу, сийгу ххисса агьлу

Вай махъсса «Илчи» кказитрал номердай на хъинну ххарину гъирарай буккара Чи­ттуратусса МахIаммадлул арс Маммаев Нураттиннуясса дакI ххари хьунсса хаварду.

Нураттиннул нину ва ппу бия та заманнул ятту-гъаттарал, хъу-лухччинул заллухъру. Ма­хIаммадлул мискин-гъаривнан, кулпат хъунмасса бунан би­ххансса хIайван булайва ссу­ттихунмай, бивкIу-хъатIи ла­хъан ка-кумаг байва тIий, буслай дикIайва хъунна бава. Укунсса нитти-буттая ххаллилсса эбрат­рансса наслугу бивзун бур…

Аьйшатлул ва МахIаммадлул хъу­­ни бувну бур шама арсгу, кIива душгу цахава лавхьхьу­сса. Шамагу арснал Гъумук 10-ва класс­гу къуртал бувну, ларай­сса кIулшивуртту ларсъссар. Хъунама арс Зайнуттиннул ттухь КIулушацIрал школалий математикалул дарс дирхьуссар. Зай­нуттиннул дарс ххуй дизлай, нава 8-мур классраву дуклакийни, пикри бувссия учитель хьун – хьугу-хьуссара. КIилчинма арснал Нураттиннул 1949 шинал Гъумучиял школа къуртал був­ссар мусил медальданий, яла мукунма ххаллилну бувккуссия Ломоносовлул цIанийсса Москавуллал университет.

Шамилчинма арснал Тажуттиннулгу школа ва шяраваллил хозяйствалул институт лавайсса кьиматирттай къуртал бувссар. Ва ттул ссил адиминая. Вайннал душ Маммаева Тамаралгу школа мусил медальданий къуртал бувссар. МахIаммадлул ва Аьйшатлул душру Сабират ва Зумрут колхозраву зий бикIайва.
Ихтилат Нураттиннуя бухьув­кун ца-кIива махъ ваная учинна
Нураттин ия гьарзатрал чулуха аькьлулул бартлавгсса, Аллагьнала муаьллимну ляхъан увсса инсан.

1958 шинал на дуклай буссияв Дагъусттаннал педучилищалуву 4-мур курсирай. На тIайла бувкра Гъумукун практикалийн. КIикку ттун хьунаавкьуна Нураттин, математикалул дарсру дихьлай. Мунал учениктал, дарс къуртал хьуну махъгу, столданул лагма лавгун, суаллу буллан бикIайва. Нураттин ттул дарсирах вичIи дишингу учIайва, кумаг байва.

Учительтурал пишакаршиву гьаз дайсса институтраву Ма­хIачкъалалив Нураттиннул бу­ккайссия математикалул дар­с­ру дишаврил хIакъиравусса лекциярду.
Нураттиннул бувцуссар хъинну бакIралгу ххуйсса, цанма лайкьсса Шуниятусса Басират. Ва зий бивкIссар школалий лабораториялий.

Басиратгу бия тарбия дусса шавхьсса хъамитайпа, кулпатгу ххирасса, ласнал хIурматгу бай­сса. Минналгу буссар ряхва оьрчI — 4 душ, 2 арс.
Арс Сулайман, медициналул элмурдал доктор, профессор. ЦIана ва ур Дагъусттаннал медакадемиялул ректор. Хъунмур душ Индира МахIачкъалаллал 37-мур школалул директорну бур. Ванил мусил медальданий къуртал був­ссар школа. Шамсият тIимур душ зий буссар Новопавловск шагьрулул хъунмур архитекторну. Зумрут кIулшивуртту дулаврил управлениялий зий бур. Ванилгу школа мусил медальданий къуртал бувссар. Аьйшат зий бивкIссар банкрай бухгалтерну.
Оьрмулухун хIурмат лавай­сса, жяматрал бакI дургьусса, ит­ххявхсса Маммаевхъал кулпатрава аьпалувух бивхьуминнан алжан булуннав, сагъминнал оьр­мурду лахъи баннав.

Айманат Къушиева,
ш. Читтур