Инсантал ххирасса инсан

МахIачкъалаллал хьхьи­чIунми школарттавух ккалли хъанахъисса 17-мур гимназиялий зий бур Ккурклиятусса СалихIова Роза Санинал душ. Щала гимназиялул коллективрал чулуха мунихь барча дан ччай бур Хъаннил байран. Ва муницIунма бавхIуну учингу ччай бур ва хъамитайпалия ца-кIива махъ.

Ванил дишайссар биологиялул дарс, дарс дишаврилгу гьунар ххи­сса усттарди. РозачIа дуклай бивкIсса оьрчIаща бюхъай ЕГЭ-лул экзаменну дулун лахъсса даражалий.
Ванил къуртал бувну бур Да­гъусттаннал университет. Зий бивкIун бур Ккурккуллал дянивмур даражалул школалий, биологиялул ва химиялул дарсру дихьлай. Мунияр махъ зий бу­ссар жул гимназиялий.

«Шаг в будущее» тIисса конфенциялий муничIа дуклакисса оьрчIал бувгьунни 2-мур кIану. Роза Саниевна буссия мединститутрал подкурсирттай лекцияртту ккалайгу, буссия гикку комиссиялул членнугу. Ва лайкь хьуну бур чIярусса грамотарттан.

МахIачкъалаллал администрациялул чулухагу дуллуну дур ХIурматрал грамота. Ва хъанахъиссар лавайсса категориялул учитель, Дагъусттаннал лайкь хьу­сса учитель, захIматрал ветеран.

Учительнал пиша, чув-бунугу, та-бунугу, ца яла лаваймур ва барчаллагьран лайкьмур пишалун хIисав хъанай бур. Му даврий тIайлабацIу буну зун шайссар анжагъ инсантал ххирасса инсаннаща.
ХIурмат лавайсса Розай, ина мукун хIурматрай ва сийлий личIаннав мудан.
Щалагу коллективрал чулуха ХIажи Амиров