[dropcap]Ц[/dropcap]Iуссалакрал райондалий Хъаннил байрандалун хасну хьунни муданма кунмасса яргсса мажлис. ЦIуссалакрал райондалул бакIчинал цIанияту хъами байрандалущал барча буллалисса ихтилат бунни райондалул депутатътурал мажлисрал председатель Мавлидин Исламаьлиевлул.
Хъиривсса концертрал программа тIиртIунни «Буратино» детсадрал мюрщултрал. Вайннал, концертрал программагу дачин дурну, барча бунни цинявппагу ниттихъул, бувккунни миннан хас бувсса шеърирду, увкунни балайрду.
Аьзизсса ниттихъул, амудадахъул, ссурвал барча буллай, ххаллилсса къавтIавуртту ккаккан дунни райондалул мажлисру чIюлу байсса, республикалий ва мунил кьатIув хьхьичIунсса кIанттурду бувгьусса «Эдельвейс» ва «ХIурия» ансамбллавасса оьрчIал.
Ххаллилсса концертрал программа хIадур дурну дия Дагъусттаннал халкьуннал артистка ХIабибат Буттаевал каялувшиндаралусса райондалул культуралул управлениялул зузалтрал. Тамашачитал ххари хьунни цила ХIабибатлул, Арслан Муслимовлул ва Арслан Шагьмардановлул балайрдая. Байрандалул сий хъиннура гьаз дунни тамашачитуран нукIува ххира хьусса Дагъусттаннал лайкь хьусса артистка Аьйшат Насруллаевал.
Балайрдал лях-карах ккаккан буллалисса Шамсуттин Къаплановлул, МахIаммад Аьлиевлул ва Расул Зайпуллаевлул интермедиярттал тяхъа буккан бунни зал.
