Дагъусттаннал БакIчинал кIанайма Владимир Васильев мартрал 2-нний хьунаавкьунни республикалул базардал ва банкетирттал къатрал каялувчитуращал ва тIалав бунни ца зурувату ягу барз ва бачIиннувату циняв базарду ва банкетирттал къатри низамрайн буцин.
[dropcap]В[/dropcap]ладимир Васильев цаппара гьантрал хьхьичI хьунаавкьуну ивкIссар хъунисса автозаправкарттал заллухъруннащал ва цинявнная тIалав бувссар циняв базарду, банкетирттал къатри, автозаправкартту налогирттал сияхIрайн лахъан буван.
Васильевлул бусаврийн бувну, интту Дагъусттаннай хьун най дур лачIун буккаврил Европанал чемпионат. «Амма му бакIуйн дуккан даншиврул арцу дикIан аьркинни, шагьру низамрайн буциншиврул, чапалшивуртту шагьрулул кьатIув дуккан даншиврул.
Буругира тагьар цукунсса дурив: хъатру дусса чIумал кьяркьи, чапалшиву дур, кьаркьсса чIумал – лах-ххит. Циванни му? Цанчирча, къатри дуллай, тиккусса чапалшивуртту ххуллурдайн дичлай бур. Ми масъалартту бартбигьиншиврул налогру дуллан аьркинни. Зун жу тIутIимур тIайлану бувчIин аьркинссар, зулгу мурад бур шагьрурдай оьрму ххуй баву», — увкунни региондалул каялувчинал.
Мунал бусаврийн бувну, ДР-лул Налогирттал къуллугърал управлениялул ккаккиярттайн чул бивщуну, республикалий бур 48 базар, миннуву ур 17 азаллий 270 машачи. 2017 шиналсса хIасиллайн бувну, базардаву маша буллалисса ишбажаранчитурал дуллуну дур 205,7 млн. къуруш налогирттал ва страховой взносирттал.
Ларгсса шинал базардал компаниярттал управляющийтурал давурттаясса дучIия (поступления) хьуну дур 95,3 млн. къуруш. «Му тема жунна аьркинни ххал дигьин. Жува ххал бан аьркинну бур базардаву маша буллалими циняв лавсун бурив сияхIрайн ягу бакъарив. Микку чIярусса диялдакъашивуртту ашкара хьуну дур», — увкунни Васильевлул.
Мунал бувсунни банкетирттал къатрал чулухасса диялдакъашивурттаятугу. Миччагу чанну дукIлай дур налогру дучIан дагьайссаннуяр. «Ми ишругу хIисавравун лавсун, ДР-лул ХIукуматрай ивтун уссар ми налогиртталсса бувансса вице-премьер», — увкунни В. Васильевлул.
Му къуллугърай цIакь увсса Рамазан Аьлиевлул бувсунни цIанасса ппурттуву налогру ратIаврил иш-тагьардания. Мунал бусаврийн бувну, ччясса мутталий циняв базардавусса ишбажаранчитал лахъан бан аьркинссар налогру дулаврил сияхIрайн, цинявннан ккаккан буван циксса багьа булун аьркинссарив ижаралий бувгьусса кIанттухлу, ми багьри буккан буван ххютула. Базардал чIарахсса кIанттурдай, кучардай маша буллалими букьан бан аьркинссар. Ми давурттайну республикалул бюджетравун 200 млн. къурушрал ялунгу дучIан тIий дур.
Владимир Васильевлул аьй дунни Дагъусттаннал налогирттал зузалтрал давурттай, налогру чансса ратIлай буну тIий. «Агарда зу аьркинсса куццуй зий бивкIссания, укунсса тагьар къадикIантIиссия. Зуща бюхълай бивкIссар налогирттал 4 млрд. къурушрал ратIин чанна-чанну, амма зу ми къарартIун дур», — увкунни республикалул каялувчинал. Мунал тIалав бунни му тагьар духлаган дуван.
ХIадур бувссар ХI. Аьдиловлул
