[dropcap]М[/dropcap]артрал 27-нний ДР-лул БакIчинал кIанайма Владимир Васильевлул каялувшиврий хьунни Антитеррорданул комиссиялул батIаву.БатIаврий ххал бивгьунни районнал ва шагьрурдал антитеррорданул комиссиярттал давурттаясса мюнпат лахъ баврил, оьрчIал гъинтнил лагерду мюхчан баврил ва цаймигу масъалартту.

Владимир Васильевлул бусаврийн бувну, ва батIаврил мурад хъанахъиссар Къизлардай ва Кемероволий кунмасса ишру тикрал къашаву.
— ХIакьинусса кьини жулла даврил ца яла агьаммур кIануну хъанахъиссар циняв даражардал антикоррупциялул комиссиярттал давурттал мюнпат лахъ баву. Пишакартурал цалва буржру бартдигьлай бур. На миннахь барчаллагь тIий ура хIакьинусса кьини республикалий тагьар цалий дарцIуну душаврихлу, нигьачIаву дакъашиврухлу. Мукунсса дур аьмсса тагьар», — увкунни мунал.

Мунищала архIал региондалул каялувчинал тапшур бунни личIлулшиву дуруччин ва давриву цIу-цIусса ххуллурду ляхълан.
— Паракьатшиву дурчала тIий, архаин хьун, паракьат хьун къааьркинссар. Душман кьюлтI хьунугу икIайссар, мунияту ми ашкара буллансса ххуллурду лякъин аьркинссар», — увкунни В. Васильевлул, Къизлардай хьусса ишгу дакIнийн бувтун.
Яла районнайсса ва шагьрурдайсса антитеррорданул комиссиярттал давурттал хIакъираву ва миннул мюнпат ххишала баврил ххуллурдая бувсунни ДР-лул УФСБ-лул хъунаманал хъиривчу Андрей Широковлул.

2018 шинал оьрчIал гъинтнил лагерду террорданул иширттая мюхчан даврил хIакъираву ихтилат бунни ДР-лул ХIукуматрал Председательнал хъиривчу – республикалул дуккаврил ва элмулул министр Уммупазил Оьмаровал. Аьщуй-ххуттай авцIусса ихтилат бунни ДР-лул виваллил иширттал министр Аьвдурашид МахIаммадовлулгу.