[dropcap]Г[/dropcap]ьашинусса шин Аьли Къаяевлун ва лакрал элмулуву, культуралуву мунал бугьлагьисса кIанттун хас даву – му багьавайсса, дан аьркинсса даву дур. Амма му баян баву ва мунал давуртту кказитрай ришлашаву къагьассар. Му хъуннасса даву щил сакин дуллалиссарив, мунил оргкомитетравун ца бухлахиссарив, цуку-цукунсса давуртту дан аьркинссарив ва ми давурттан цуксса харж аьркинссарив, му харж щил бишинтIиссарив кIулну бикIан аьркинни.
Хъунасса аьлимчунал циняв давуртту уттигу миллатрачIан дирну дакъашиву – му жуйрасса хъуннасса аьйри.
Аьли Къаяевлул цIанийсса фондраясса материал рирщуну дия «Илчи» кказитрал гьашинусса 3-мур номерданий. Му фондрал вакилтуращалсса хьунабакьаврия бувсун бия, цурда фондрая, мунил дуллалимуния, планная сайки цичIав бакъая. Му даву ччива ца мяълумсса низамрай, бюхттулсса, му хъунасса аьлимчунал аьпалун лайкьсса даражалий сакин дурну, элмулул идарарттащалгу маслихIат ккавккун (ДНЦ-лул институтру,
Канихчичрурдал фонд, Востоковедениелул факультет, личIи-личIисса вузирдавусса теологиялул кафедрарду ва ц.). Бюхъанссия тарихрал ва мазурдил идарарттугу хIалану аьмсса элмийсса конференция дан. Му багьандарансса мероприятие къархьуну, республикалул жяматий оьрмулуву яргсса, мюнпатсса даву хьуншиврул.
«Илчилий» бувсун бия хIакьинусса кьининин мунал архиврал 10 процентвагу ххал бивгьуну бакъашиву. Аьлимчунал варистурал архивравумигу, Элмий центрданул Канихчичрурдал фондравумигу давурттал сияхI кIулну хъина. Ми давуртту ххал дигьавриву хьунадакьлакьисса захIматшивурттугу, ца чулийн бичинсса масъаларттугу чансса бакъар. КIулсса куццуй, мунал давуртту чирчуну дур царай аьраб мазрай, гайми лакку мазрай, аьжам чичрулий.
Жула, лакрал, лакку мазраха зузиминнал хъунмур бургаву дикIан аьркинни лакку мазрайми давуртту, цIанасса чичрулийнгу дурцуну, ми миллатрачIан диян даврих. Му даву жучIара дайдирхьуну дур 60-ку шиннардийра. Масала, мунал бавтIсса учалартту ва бусалартту бивщуну бур «Дусшиву» журналданул цачIусса 3-4-мур номерданий 1967 шинал. Лакрал историялийн багьайсса мунал давурттавасса парчри бивщуну бур мува журналданий («Литературалул Дагъусттан», «ЦIубарз») 80-90-ку шиннардий.
Аь. Къаяевлул ирс миллатран аьч баврицIун дархIусса яла агьамми давуртту дурккун дур 2006-2010-ку шиннардий. Ми хъанай дур: «Лакку маз ва тарих» тIисса энциклопедиялул словарь (2006), «Лакку мазрал грамматика» (2009), «Лакку мазрал ва тарихрал материаллу» (2010). Вай давуртту дунияллийн дуккан дан, аьжам хатI уттисса чичрулийн буцин биялсса захIмат бивхьуссар У. ХI. ХIажиевал («Лакку маз ва тарих»), Н. Кьурбайтаевал («Лакку мазрал ва тарихрал материаллу»), «Лакку мазрал грамматика» тIурча Аь. Къаяевлул арснал бувцуну бия ттисса графикалийн. Илияс КъаяевлучIасса канил чичрулия му даву компьютерданийнгу ларсун, редакторшивугу на дурссия.
Гьай-гьай, тахсир бакъасса танмихIрахьхьун иривсса аьлимчунал цукунсса-бунугу чагъардал кьютIай чивчусса словарь, мунал хатIгу тIайлану уттимур чичрулийн бувцуну, дунияллийн буккан бан хъунмасса захIмат хьуссар. Микку бур букъавчIайссагу, лях лавгссагу кIанттурду. Амма, цукун-бунугу, му дунияллийн буккаву хъуннасса давур, му даврил хъунмур хъаргу цайнна ларсун дия профессор Н.С. Жидалаевлул. Мунал чивчуну бур аьлимчунаясса гьарта-гьарзасса хьхьичIмахъгу, словарданул сакиншиннараясса статьягу.
ХьхьичIми кIира даву дунияллийн дурккун дур грантрал ва спонсортурал кумаграцIух. Махъра-махъмур давугу («Лакку мазрал ва тарихрал материаллу») итадакьин харж бивхьуну бур жула культуралий дакI цIуцIисса жяматий ишккакку Амучи Амуттиновлул кумаграцIух. Амма, цуксса хIайпнугу, ва давривусса материаллу низамрайн дурцуну дакъар, редакторнал даву хъинну лащинну хьуну дур. ЧIявусса бур тикрал хъанахъисса кIанттурду, дайдихьу ахирданий, дайлитIу бакIрай дуссагу чичрурду дур. Лакрал тарихрайн дагьайми материаллу, электронный вариантрай, нара дуцав ца низамрайн. Бюхъанссар ми жула журналданий, кказитрай рищунгу.
Аь.Къаяевлул лакку мазрайми давуртту рищун хIадур дайни, хIисавравун ласунсса кIанттурдугу бур. Ми давуртту чирчуну дур бухмур литературалул мазрай (мува жура буссар П.К.Услардул лакку мазраясса давривугу, хIучча бакъа му вицIхъиял лугъатран ккалли бувну бур жула лингвистътурал). Аьлимчунал мазраву дур цIанамур мазраву дакъасса аьламатру: цачIу яхьуну бур нд, лд, утти в бумур кIанттай б бур ва цаймигу хасшиннарду (миндул, шамхалдучIа, учIабу). Амма журналлай бивщуми ва цIана кказитрай бишлашими текстирдаву ттизаманнул нормарду ишла дурну дур. Ва зат, ттул пикрилий, къатIайлар. Му мукун бан бучIир так школалул учебникирттаву ишла буллай бухьурча, адаптация дурну. Мунал цаламур текст баххана къабувну чичин аьркинни, мазрал элмулуву мунил хъуннасса агьамшиву дуну тIий.
Цала Аьли Къаяевлул даврия, мунал Дагъусттаннал культуралуву бувгьусса кIанттуя бусласисса давурттугу жунна кIулну дикIан аьркинссар. Цалчин жува барчаллагь учин аьркинссар даргиял миллатраясса аьлимтурахь: профессор МахIаммад Аьбдуллаевлухь ва мунал каялувшиврулу Аь.Къаяевлуясса кандидатшиврул диссертация чирчусса Ю.В. Меджидовлухь. Вайннал итадаркьуну дур «Дагестан: время, судьбы» тIисса сериялий «Али Каяев» тIисса монографиягу (1993 ш.).
Лакрал аьлимтуралгу тамансса статьяртту чивчуну бур А.Къаяевлуя: И.Х. Аьбдуллаевлул, Н.С. Жидалаевлул, А.ХI. ХIусайнаевлул. Ттинин Аь. Къаяевлуя чирчусса ца яла агьаммур даврин на ккалли давияв С.А. Мусаевлул «Замир Аьли» тIисса эссе (2014 ш.). Ва дур ттинин Аь. Къаяевлуя кIулну бивкIмур, ванаяту чивчумур жям буллалисса, ванал мировоззрениелул анализ дуллалисса куртIсса даву. Авторнал кIицI ларгун дур цинярда аьлимчуная чирчусса давуртту. Даву цурда художественный литературалул элементругу хIаласса дур – цала оьрму хьхьичI бацIлай бур ватандалия уккан увсса, больницалий ивкIлакIисса аьлимчунан. ЦIагу даххана дурну, вай художественныйми ххибавурттугу дукьан дарча, ва даву дацIанссия докторнал диссертациялул кIанай.
Аьли Къаяевлул шин лахъа-хъунну кIицI лагаврил ххуллий ДНЦ РАН-далул цания ца институтраща бюхъанссия региондалул лагрулийсса элмийсса конференциягу дан, микку бувккусса докладругу бищун. Роза Эльдарова,
доцент
