Дагъусттаннал студентътал – Оманнай
Февраль барз къуртал хъанахъисса гьантрай Дагъусттаннал делегация лавгссия архсса Оманнал билаятрайн. Делегациялуву буссия Дагъусттаннал гуманитар институтрал ректор Мурад Шяпиев, Аьрабусттаннал билаятирттайсса Дагъусттаннал муфтийнал вакил, аьрабнал филологиялул доктор Шихабуттин ХIусайнов, Национал политикалул иширтталсса буллалисса министерствалул вакил Израил Кебедов, Дагъусттаннал паччахIлугърал университетрал ректор Муртузяли Рабаданов.
П. Рамазанова
Цалчинсса кьинива Дагъусттаннал делегация хьунабавкьуну бур Оманнал исламрал институтрал ректор Аьбдулла бин Мусаллам аль- Хашимийщал. Микку икьрал дурну дур Дагъусттаннал гуманитар институтрал ва Дагъусттаннал паччахIлугърал университетрал студентътал стажировкалий Оманнайн тIайла буккаван, кIивайнналагу вузру уртакьну зун. Хъирив кьини, февраль зурул 26-нний, жулва делегация хьунабавкьуну бур Султанат Оманнал Верховный Муфтийнащал. Микку ххал бивгьуну бур Оманнал билаятращал гьурттуну Дагъусттаннай инвестициялул проектру бартдигьаврил масъалартту. Верховный муфтий АхIмад бин Хамад аль-Халилийл махъ буллуну бур чIал къавхьуну Дагъусттаннайн учIан.
