[dropcap]И[/dropcap]тникьини, январь зурул 29-нний, Дагъусттаннал Виваллил иширттал министерствалул клубраву хьунни машгьурсса артис­туращалсса хьунабакьаву.
Андриана Аьбдуллаева
[dropcap]Д[/dropcap]агъусттаннал виваллил ишир­ттал министр, полициялул ге­не­рал-лейтенант Аьвдурашид МахIаммадовлул оьвкуну, респуб­ликалийн хъамалу бувкIун бия тамашачитуран ххира хьусса личIи-личIисса сериаллаву ихтиярду дуруччай органнал зузалтрал рольлу дургьусса артистал: АьФ-лул лайкь хьусса артист, кинорежиссер, продюсер, сценарист, телеведующий Михаил Пореченков («Агент национальной безопасности», «Убойная сила», Последний бой», «Белая гвардия», «Контригра» ва м.ц.), актер, кинорежиссер, сценарист, телеведущий Сергей Маховиков («Платина», «Гончие», «Одиссея сыщика Гурова», «Личное дело капитана Рюмина», «Белая стрела» ва м.ц.), актер, продюсер, телеведущий, жяматийсса ишккакку, «Служение искусству» тIисса Мусил орден лайкь дурсса Алексей Огурцов («СОБР», «Участковый», «Расплата», «На дальней заставе», «Обнимая небо», «Лютый», «Истребители», ва м.ц.), актер, телеведущий Александр Носик («В круге первом», «Возвращение Мухтара», «Месть», «Тихие сосны», «Стрелок» ва м.ц.), актриса, Москавуллал ХIурматлувсса искусствалул ишккакку Виктория Тарасова («Глухарь», «Полицейский с Рублевки», «Один против всех», «Пятницкий», «Карпов» ва м.ц.).
[dropcap]Х[/dropcap]ьунабакьаврий гьуртту хьунни Аьбдурашид МахIаммадов, ванал заместитель, полициялул генерал-майор Сергей Карпов, ДР-лул военком Дайтбег Мустапаев. Артистуращал хьунабакьин мукунма бувкIун бия МВД-лул, УФСВНГ-лул зузалт, кадетътал, ххассал бувулт.
Артистурал хъинну хIазну бувсунни цала кулпатирттая, оьр­мулувусса иширттая, роллая, къуллугърацIун бавхIусса аьрххирдая. Алексей Огурцовлул бувсунни, цащала хIакьину Дагъусттаннайн бувкIсса коллегахъул Сириянаву бивкIшиву, Аьрасатнал авиабазардай вайннал аьралитурал дакIру дансса творчествалул вечерду дуршиву.
— Жул давугу дунияллул терроризмалущал талатисса къуллу­гъирттал дуллалимуниха лархьхьу­сса дур. Зу буру билаятрал ва агьалинал мурадру буручлай, къаралданий бавцIуну. Зу кунмасса вирттавращал хьунабакьин тIааьнну бур, жувагу полициялул зузалтрал роллу дургьусса артистал бухьувкун, — увкунни А. Огурцовлул. Сергей Маховиковлул бувсунни цала ца бакъа бакъасса душ ххуйсса чIу бусса, балай учин гьунар бусса бушиву. Виктория Тарасоварив бия цуппа мудан диеталий бушиву ва хъинну чансса зат дукайшиву, амма Да­гъусттаннал дукрардал нахIушиврул яхI бан къавхьуну, шийх низамрава був­к­шиву буслай. Александр Носиклул бувсунни цува чув ккаккарчагу, Мухтар тIий ккаккан уллай бушиву, цангу мудан «на Мухтар акъара, Александр ура» тIий жаваб дуллан багьайшиву. Михаил Пореченковлул бувсунни цала ххюва оьрчI бушиву. Бувсунни цанма цинярдагу цалла дургьусса роллу цакуццуй ххирашиву.
«Лёха Николаев мудангу кьюкь­луву уссар. Ва ттигу хьуна­акьинтIиссар тамашачитуращал, ялугьлагьи «Агент национальной безопасности» сериалданул 2-мур бутIух», — увкунни ванал ихтилат къуртал буллай.
Артистал циняв бия хъярч-махсартту бусса хIазсса ихтилатчитал. Гьарица цала бусласисса хавар бавкьусса анекдотирттайну байбишайва ягу къуртал байва. Хьунабакьаву лахъи ларгсса сайки шанна ссятрай залдануву хъяхъавурттал чIурду чан къавхьуна.
Залдануву буллусса, «Мусил чавахъ» биривссания, ци чIа учинтIиссия тIисса суалданухьхьунгу цинявннал кутIасса ва куртIсса жавабру дуллуна:
А. Носик. «Ттунна ччимур нара дан цIуллушиву, аькьлу ва дакI».
М. Пореченков: «На му хьхьирийх итабакьинтIиссия, гьузузу винма ччикун тархъанну куну. Гьарица инсан цана цувари «Мусил чавахъ».
С. Моховиков. «Инсан зат чIа тIун икIайссар захIматсса, къума-цIансса чIумал. Оьрмулуву гьарзат ххуйну бухьурча, ци чIа учин­ссарив къакIулну икIайссар. Ссавния цIуку багьну нанисса чIумал, га бакъа хьуннин дакIниймур чIа учин аьркинссар тIий баяйва. Цимилагу багьну нанисса цIуку ххал хьуну, ци чIа учин хъинавав тIий унува, бакъа шайва. Цаягу инсан чIа тIисса кIанайн къаагьаннав. Ва ялагу, ттун ччива жула билаят бюх­ттулсса даражалийн лавхъун, Совет Союз куннасса билаятрай ялапар хъанай жула оьрчIру».
В. Тарасова. «Инсантурал дакIурдиву хъиншиву, чурххаву цIуллушиву лирккун ччива учивияв».
Ихтилатру къуртал хьуну махъ Сергей Моховиковлул цалвла чивчусса мукъурттийссагу цайми автортуралгу балайрду увкуну, ххарил лехлахи бунни цува ххирами. Ванал увкунни Аьвдурашид МахIаммадовлун хас бувсса балайгу.
Залданувуми бивзун бавцIуну, кьакъабагьавай хъатру ришлай лахъа-хъун унни балайчи.
Дагъусттаннал Виваллил ишир­ттал министерствалул чулуха цинявппа артистуран буллунни тIутIал кацIру ва хахливу бивхьусса авурсса «Барчаллагьрал чагъарду». Циняв­ппа шиккун бувкIми артистураща автографру ласлай, суратру ришлай бия. Сант дирирну дунура, нагу рищав ххирасса артистуращал дакIний личIансса суратру.
Цинявппа барчаллагьрай бия виваллил иширттал министрнайн ва ххаллилсса хьунабакьаврихлу.