Язи бугьантIиссар яла итххявхми

[dropcap]Ф[/dropcap]евраль зурул 27-нния март зурул 2-ннийн бияннин Дагъус­ттаннай хьунтIиссар (WorldSkills Russia) «Жагьилсса пишакартал» тIисса региондалул III-мур чемпионат. Чемпионатрайн­сса хIадуршиннарая бусласисса конференция хьунни «Дагестан» РИА-лул редакциялий. Конференциялул даву дайдишин хьхьичI, республикалул жагьилтал давурттал щаллу буллалисса «Успех» центрданул директор Шамил МахIаммадовлул бувсунни «Наставник – 2018» тIисса цалчинсса щалагу Аьрасатнал форумрай Дагъусттаннал делегациялул дурсса гьурттушиндарая.


Имара Саидова
[dropcap]Н[/dropcap]асихIатчитурал форумрай Дагъусттаннал чулуха гьуртту хьуну ур Аьрасатнал лайкь хьусса тренер Аьвдулманап НурмахIаммадов.
Аь.НурмахIаммадовлул аякьалийн лавсун, вардиш буллай ивкIсса ацIа ятинсса оьрчIая хьуну бур дунияллул чемпионтал. Форумрай ванал дурсса даврин бивщуну бур лайкьсса кьимат.
Шамил МахIаммадовлул бувсунни чIал къавхьуну республикалий дайдишинтIисса захIматрал пишарду машгьур баврил чемпионатрал даврия. Чемпионатрал даву шадлугърал даражалий тIитIинтIиссар февраль зурул 17-нний МахIачкъалалий Дусшиврул къатраву. Гьашинусса бяст-ччаллаву гьуртту хьунтIиссар, республикалул вузирдал студентътал бакъассагу, Санкт-Петербургуллал, Къубаннал ва Аьшттарханнал областьраясса 150-нния ливчусса жагьилсса пишакартал.
Чемпионатрай 16 шиная 23 шинайн бияннинсса оьрмулул оьрчIал дянивсса бяст-ччаллу хьунтIиссар 23 журалул. Жагьилсса пишакартурал ккаккан дантIиссар машинартту бакьин баврил, миннуха къуллугъ баврил, сварка даврил технологиярттал, строительствалул, заргалшиврул, штукатурка даврил ва цаймигу пишардал усттаршиву.
JuniorSkills тIисса чIава жагьилтурал дянивсса пишардал усттаршиву ккаккан даврил бяст-ччаллаву гьуртту хьунтIиссар 10-17 шинавун бияннинсса оьрмулул оьрчIру ва душру.
Мукунма гьашинусса чемпионатрай хьунтIиссар усру дуруххаврил, шашлыкру даврил ва суратру рищаврил пишардал усттаршиву ккаккан дуллалисса презентациярдугу.
Шикку ххув хьусса оьрчIру щалагу Аьрасатнал ва дунияллул халкьуннал даражалийсса чемпионатрайн хIадур буллан тIайла буккантIиссар авадансса ва хьхьичIунсса техникалул базарду бусса регионнайсса предприятиярттайн.
ЗахIматрал пишардал усттаршиву ккаккан дурну, ххув хьу­сса оьрчIру кьамул бувантIиссар Аьра­сатнал ва жула региондалийсса хьхьичIунсса предприятиярттай зун.