«Гьарцагу чIавахьулттива баллай бикIайва ванал букьвасса чIу»

Владимир Высоцкий ниттил увну 80 шин шаврин хас дурсса чIярусса батIавуртту хьунни щалвагу билаятрай. Миннувасса ца хьунни январьданул 29-нний Каспийскалий шагьрулул хъунмур библиотекалий.


Бадрижамал Аьлиева
Мунивух гьуртту хьунни шагьрулул школардал дуклаки оьрчIру, В. Высоцкийл гьунарданул ясир бувми. БатIаву дайдихьлай, «Аьрасатнал ниттихъул» тIисса цIанилусса суккушиндарал Дагъусттаннайсса отделениялул председатель Таиса МахIаммадовал кIицI лавгунни ва кьинисса даву махъа нанисса ник ихIсандалул ххуллий, эстетикалул тIин-тIааьн буну, ватан ххирану тарбия шаву мурадрай буллалисса ихтилатирттал ца бутIа бушиву.
ЦБС-рал библиотекарьтурал бувсунни цува сагъну унава бусалардавун агьсса балайчинал оьрмулия ва творчествалия.
— Ванал балайрдах вичIи къадишайссавагу акъахьунссия. Ванал букьвасса чIу баллай бикIайва гьарцагу чIавахьулттива. Щалагу билаятрай, кувннаща кувннахьхьун дуллай, кувнначIату кувннал чичлай бия мунал балайрдал кассетарду. Дунияллия лавгун махърив мунал цIарду дизлай бур театрдан, жамирдан. Къиримнал обсерваториялул астрономтурал цалла тIиртIусса планеталун дирзунни Владимир Высоцкийл цIа. Альпинистурал тIурча, ванал цIа дизлай бур га яла лахъан захIматсса зунттурдан, шаэртурал, художниктурал мунан цIа куну чичлай бур цала произведенияртту. Высоцкийл балайрдава­сса махъру мармарчарий чичлай бур. Ва уттаванува ур ванал творчество ххираминнал дакIурдиву. Ванаяту чIявусса чичлай бур, ласлай бур передачартту ва кинофильмру.
Шаэр Р. Рождественскийл чивчуну бур: «Ттун къакIулли Владимир Высоцкий ххишалану цуну ивкIссарив. Актерну? Шаэрну? Балайчину? КIулли му ца аьламатсса ишну ивкIшиву», — куну.
Высоцкий ивкIуссар 1980-ку шинал, Москавлив Олимпиада нанисса гьантрай. Ванал бивкIулул хавар най буна ппив хьуссар щалагу билаятрайх. Му кьини Таганскаллал майданнив бавтIссар 400 азаруннийн бивсса инсантал – мугу Олимпиада наниссаксса хIаллай лавкьусса шагьрулий. Инсантал нех дирхьуну, захIматшивурттах къабурувгун, най бивкIссар Москавлив цана ххирасса артист, шаэр махъва-махъсса ххуллийн тIайла уккан, мугу – цала хушрай, буккияра, бачияра куну бакъача, ялунгума мабуккару тIиминнах къавичIидирхьуну, — буслай бия вай.
Ихтилатирттал лях-карах итабакьлай бия Высоцкийл балайрду. Шагьрулул 1-мур школалул дуклаки оьрчIал ккалай бия ванал наз­мурду.