[dropcap]Ф[/dropcap]евраль зурул шамунний Москавлив Новодевичье хIатталлив Совет Союзрал кIийла Виричу, бусалардавун агьсса летчик АхIмадхан Султаннул гьаттайтIутIив дишин бавтIуна Дагъусттаннал ва Къиримнал агьлу, ЛИИ-лул летчиктал- испытательтал, Виричунал гьалмахтал.

ПатIимат Рамазанова
ДакIнийн бутанну, вас-ццах къакIулсса летчик, шаэрнал тIийкун, «ссавнил пагьламан», АхIмадхан экипажращал архIал 1971 шинал февраль зурул цанний лавгшиву дунияллия, цIусса самолет ТУ-16 ххал дигьлай бунува.
Бусурманнал аьдатрай, цал Москавливсса Къирим-татарнал общиналул хъуначу Асан-агъа Аьдиловлул алхIам бувккуна. М.М. Громовлул цIанийсса летно-исследовательский институтрал цIанияту ихтилат буллай, Аьрасатнал Виричу, СССР-данул лайкь хьусса штурман-испытатель Попов Леонид Степановичлул бувсуна Виричунал оьрмулул ххуллия ва гьунардая. Аьрасатнал лайкь хьу­сса летчик-испытатель, Аьрасатнал Виричу МахIаммад Толбоевлул бувсуна дяъвилул хъиривсса шиннардий цIусса самолетру ххал дигьлайгу, космосравун леххансса цалчинсса космонавтътал хIадур буллайгу АхIмадхан Султаннул хъунисса давурттив дуршиву. Авиациялул полковник, авиакатастрофарттал испытательный центрданул хъунама летчик-эксперт, Аьрасатнал лайкь хьусса аьрали летчик, 1-мур ЦIувкIратусса Рамазанов Рамазаннул бувсуна Виричунал бу­ттал шяраву цуку-цукунсса давурттив дувайссарив мунал аьпалул хIурматран. Совет Союзрал Виричу Абилов Фетислямлул хъунама арс, цалчинмур ранграл капитан Абилов Дмитрийл бувсуна цала ппу ва АхIмадхан Султан ххуйсса дустал бивкIшиву, цувагу, чIивима уссу Михаилгу АхIмадханнул арсурвавращал Станиславлущал ва Арсланнущал гьалмахтал бивкIшиву. Бувсуна цува Виричугу, мунал арсругу ччяни дунияллия лагавугу кьурчIи бизлайнува ушиву, цувагу дустурал буттал ва цалама буттал гьалмахчунал гьаттайн цалчин увкIшиву. И.М.Сеченовлул цIанийсса Цалчинмур медициналул университет­рал профессор, «Дагестан» культуралул центрданул вице-президент Шайхаьлиев Астемирдул кIицI лавгуна, Къиримнаву ва Дагъусттаннай бакъагу, бюхттулсса летчикнал цIанил хIурмат бушиву щалвагу Аьрасатнаву, махъсса шиннардий Ярославрайгу, Дымокурцы шяравугу дацIан дуршиву мунал гьайкаллу. Ванал маслихIат бувна, къиримнал татаргу, лакгу, Да­гъусттаннал цайми миллатругу лагма лавгун, Москавлив АхIмадхан Султаннун хас дурсса мероприятияртту дуваван. Къиримнал татарнал ккурандалул вакил, журналист ва жяматийсса ишккакку Ибраим Военныйл бувсуна хъунасса летчикнал дяъви къуртал хьуну махъгу бувшиву яла хъунмур гьунар – гражданин хIисаврайсса: къиримнал татарнан захIматсса ппурттуву, анкетарттай миллат ккаккан бувайни, буттал миллат ккаккан буван бюхълай бунува, мунал ниттилмур ккаккан бувайсса бивкIшиву, цува кьини дуркминнал чIарахацIуну уну тIий. Бувсуна мунан лакгу, къиримнал татаргу цакуцну ххирану бивкIшиву. АхIмадханнул ниттил ссурахъил душ Аппазова Аллал бувсуна Виричу-летчик ичIува цукунсса ивкIссарив, бувсуна нитти-буттаягу. Мунил барчаллагь увкуна, замгьарданухгу къабурувгун, хIатталлив бавтIцириннахь.
Муданма кунма, гьаттайн бавтIцириннавух бия Москавлив яхъанахъисса цIувкIулгу.