«Дагъусттаннаясса 500 суал» тIисса цIусса энциклопедия-луттирал презентация хьунни ва нюжмардий «Дагестанская правда» кказитрал редакциялий. Дагъусттаннал тарихрайн, тIабиаьтрайн, культуралийн, аьдатирттайн, спортрайн ва цаймигу арардайн багьайсса суаллу ва миннухьхьунсса жавабру цачIун дурсса ва луттирал автор ур ДНЦ-лий зузисса жагьилсса пишакар Марат Ибрагьимов.
З. АьбдурахIманова
Ряхра шин хьуну дур ванал ми суаллу сакин буллай, миннува хIазми язи бугьлай. Ванал бусаврийну, лу итабавкьуну бур ДР-лул Жагьилтурал иширттал министерствалул грантрал кумаграйну.
Ми суаллу батIлан хьхьичI Марат машхул хьуну ивкIун ур интеллектуал тIуркIурдахун. Цува увсса ва хъуна хьусса Шамхаллал 49-мур школалий ккалаккинийва гьуртту шайсса ивкIун ур «Брей-ринг», «Что? Где? Когда?» тIисса тIуркIурдавух. Мукуна, МахIачкъалаллал Финансирттал ва правалул институтраву ккалаккинийгу, ванайн оьвчайсса бивкIун бур тIуркIурдавух гьуртту хьун. Цаппара хIаллава Маратлухь тавакъю буллан бивкIун бур интеллектуал тIуркIурдай ишла буллансса суаллу сакин бува тIий. Вания хьуну дур энциклопедия сакин буваврил дайдихьугу.
Лу хъунмурчIин лахъми классирттаву дуклакисса оьрчIал ва студентътурал ишла бансса бур.
Маратлул уттиния гихунмайсса мурадгу бур «Дагъусттаннаясса 1000 суал» тIисса луттирал ялув зунсса. Муниву, ванал бусаврийну, цIана итабавкьумур луттиравун къабагьмуния цIухху-бусу бансса умуд бур.
