ЦIусса хаварду ца-кIива ххуттайну

«Лулттурасри»  сававсса хайр
Саоьдуллал Аьрабусттаннай коррупция къяцIул дугьаву мурадрайсса даврил билаятрал бюджетравун бучIан бувну бур 107 миллиард доллардал.

Тайннал генпрокурорнал баян бунни коррупциялувух хIаласса бизнесментурая ва хъуни къуллугъчитурая тIалав дуршиву миксса арцу. Дуснакьрайн багьан къаччиминнал дуллуну дур тIалав дуллалиссаксса арцу. Арцу къадуллусса 56 инсан – бизнесментал ва чиновниктал дуснакь бувантIишиву баян бувну бур. Январь зурул ахирданий итабавкьуну бур арцу дулуннин Эр-Риядрал патирдануву бацIан бувну бивкIсса къуллугъчитал ва предпринимательтал, миннавух ур принц Аль-Валид бен Таляльгу.

Дуснакьрава – отпускалийн

Ираннаву дуснакь ув­сса 81 шин хьусса американнан мукьва гьантлийсса отпуск дуллуну дур. Бакер Намазил Ираннал ва Американал гражданство дур, ацIра шинайсса дуснакьгу увну ур, ясусшиву дуллалисса тахсир ккавккун. Амма Ираннал властирдал, ччя-ччяни къашавай хъанахъисса, угьарасса адамина мукьва гьантлийсса шавай итаакьинсса хIукму бувну бур. Американал Госдепартаметраллив тIалав бунни Ираннал дуснакьирттавусса Американал циняв граждантал мурахас буван.

Раввин Аьрасатнава лихъан унни

Ульяновскаллал областьрал хъунама раввин Йозеф Марозоф Аьрасатнава лихъан унни «экстремизмалуцIун кабакьлай» уну тIий. Щарссанищал ва ряхва оьрчIащал му Американавун тIайла увккунни. АцIния кIира шинал хьхьичI Йозеф США- нава увкIун ур. УФСБ-лул хъирив багьну, му экстремистътурал тарап дургьуну ушиву тахсирну ккаклай бур, цува раввинма мукIру хъанай акъар. Верховный судрайнгу аьрзирай увккун ивкIун ур Йозеф, цайва тахсир бакъашиву исват бувансса мурадрай.

Сириянал къашайшалтрансса
кумагран

Сириянал захIматну къашавайсса 100 инсаннай операцияртту бувансса арцу дулун бакIрайн лавсунни АхIмад-ХIажи Кьадировлул цIанийсса фондрал. «Фондрал президент Аймани Кьадировал тапшур бунни Сириянал 100 инсаннан­сса операцияхлу хIакь булун», — увкунни Гъанмур Машрикьливсса ва Ухссавнил Африканавусса Чачаннал вакил Зияд Сабсаблул. Ванала бувсунни Сириянаву Кьурбан-байран дуллали­сса гьантрай фондрал ацIазарва хIайван машан ласунтIишиву, бивххун, миннул дикI агьалинайх дачIинтIишиву.

ХIадур бувссар
П. Рамазановал