Цалва-цалва буруккинттащал

Февральданул 7-нний ДР-лул культуралул министрнал буржру чIумуйну биттур буллалисса Зарема Буттаевал кьамул бунни агьали. Ва кьини министрначIан увкIсса 10 инсаннал бия личIи-личIисса мурадру. Ми мурадирттавасса цаппара бусса кIанайва щаллу бунни министрнал. Цинявннул хIакъиравурив кьамул бунни хIукмурду, бунни аьркинсса маслихIатру.


Бадрижамал Аьлиева
Гъази-Гъумучату увкIун ия «РТР-2» цIанилусса райондалул телевидениялул корреспондент Билал Муртазялиев. Муналмур мурад бия «Лакия» тIисса проект щаллу даврицIун бавхIусса. Министрнахь мунал бувсунни райондалий, аьмну щаллагу республикалий кунна, шайшиву культуралул чIярусса мероприятияртту, амма телеэфирданувун хъунмурчIин багьайшиву хавардацIун бавхIуми ишру. «Лакия» проектрайн бувнурив, ванал пикрилий, бюхъанссия гьарта-гьарзану чIалачIи буллан райондалул культуралул оьрмулуву хъанахъимур. Зарема Буттаевал му масъалалул хIакъираву ихтилат банну кунни «Дагестан» РГВК-лул хъуниминнащал.
Къизлардал 1-мур искусствалул школалул преподавательтурал делегация бия бувкIун, чIявусса преподавательтал давурттая букьан буллалаврицIун дархIуну, школалул коллективраву хIасул хьусса тагьарданул хъирив лаяву тавакъю буллай. Зарема Буттаевал миннащалсса ихтилатраву кIицI лавгунни хIакьмур чIалачIи буваншиврул цин кIивагу чулухаллил тIимуних вичIи дишин аьркиншиву ва махъ буллунни, сант дагьайхту, бучIан Къизлардайн ва хьумунил хъирив лаян. Ялув кIицI лавгсса школалий 28 преподаватель укьан увну ур даврия, миннавату 17 – даврил хъунмасса опыт бусса.
Дарбантлиясса Кавсарат Аьли­мурадова бувкIун бия цила къатта-къушлил шартIру къулай даврицIун бавхIусса масъалалущал. Му ялапар хъанай бусса бур шагьрулул тарихиймур бутIуй, цувгу ЮНЕСКО-лул ихтиярданий бу­сса. Къатлул диц-куц даххана дуваншиврул тайннал чулухасса изму аьркин хъанай бусса бур. Зарема Буттаевал бувчIин бунни цIанасса чIумал му масъалалулсса буллай ДР-лул Культуралул ирс буруччаврил агентство бушиву. Миккува оьвкунни му агентствалул зузалайн ва тавакъю бунни ва иширал хъирив лаян.