Январьданул 21-нний ДР-лул ХIукуматрал председательнал кIанайма Аьбдуссамад ХIамидовлул ПаччахIлугърал Думалул депутат, 2018 шинал лачIун буккаврил Европанал чемпионатрал сакиншиндарал комитетрал член Мурад ХIажиевлущал цачIу ххал диргьунни «Каспий» санаториялий лачIунбуккулт ялапар хъанансса шартIру дузал дуллали­сса кIанайсса давуртту.

[dropcap]М[/dropcap]анасрайсса санаториялий буллай бур янна даххана давансса цIусса къатри, душевойрду, туркнал журалийсса, финнал журалийсса хIаммамру, дуллай бур цIусса лифтру ва цаймигу журалул давуртту.
Аьбдуссамад ХIамидовлул бусаврийн бувну, микку дузал дантIий дур ххуйсса инфраст­руктура, санаториялул каялувчинал бакIрайн лавсун бур цинярда ремонтрал давуртту дуван ва тиккусса мебель, кьай-кьуй даххана дуван. «Цинярда давуртту дуллай бур пландалий ккаккан дурсса низамрай. Иширайну 4-мур ва 5-мур зивурдай­сса давуртту дурну къуртал хьуну дур, цIана зий бур 6-мур зивулий. Ца зурувату мигу къуртал данссар. Инфраструктура дузал дурну хIадур шавай дур, — увкунни премьер-министрнал. Мунал мукунма бувсунни чемпионатрал чIумал санаториялий яхъанантIий бушиву 600-нная ливчусса спортсментал.
Мурад ХIажиевлул кIицI бу­нни республикалун континентрал чемпионат – му хъинну агьамсса, жаваблувсса давуну хъанахъишиву. «Республикалул каялувчитуралгу, «ЛачIун бу­ккаврил цачIусса дуниял» («объединенный мир вольной борьбы») тIисса дунияллул халкьуннал федерациялул каялувчитуралгу итталу дикIантIиссар вай объектру. Ттул пикрилий, Европанал чемпионат жура лайкьну дантIиссар», — увкунни ПаччахIлугърал Думалул депутатнал.

ХIадур бувссар
ХI. Аьдиловлул