Татарсттаннал Президент Дагъусттаннай

Февральданул 4-нний МахIачкъалаллал аэропортрай Татарсттаннал Президент Русттам Минниханов хьунаавкьунни ДР-лул БакIчинал кIанайма Владимир Васильевлул.


Февральданул 5-нний ДР-лул БакIчинал кIанайма Владимир Васильев ва Татарсттаннал Президент Русттам Минниханов бивунни Дарбантуллал дукиялул ва переработкалул хъуними предприятиярттайн – коньяк дайсса комбинатрайн ва чяхир дайсса заводрайн. Ми предприятиярттал бакIчитурал хъамаллурахь бувсунни коньяк ва чяхир дуккан даврил хIалкьазиялия.
Гара кьини Владимир Васильев ва Русттам Минниханов бувкIунни Дарбантуллал Нарын-Къала ххал бан, яла бивунни нюжмар-ми­зитрайн. Бусравсса хъамаллуращал архIал бивзунни ДР-лул БакIчинал кIанайманал кьиблалул округрайсса вакил Энрик Муслимов ва Дарбант шагьрулул бакIчи Малик Баглиев.
Гара кьини хьусса батIаврий Русттам Миннихановлул бусаврийн бувну, Дагъусттаннал ва Татарсттаннал дянив цIанасса ппур­ттуву дахху-ласу хъанай дур сайки 1 млрд. къурушрансса. «Ттул пикрилий, жура ххюйлла ххи дан аьркин­сса жулла республикарттал дянив­сса дахху-ласу, му жущава бюхъай­сса затри», — увкунни ганал.
Владимир Васильевлул ва Рус­ттам Миннихановлул кьутIи дунни хIала-гьурттуну зун машлул ва экономикалул элмулул ва техникалул культуралул ххуллий. Ва мукунма кIирагу регион зунтIиссар хIала-гьурттуну шяраваллил хозяйствалул, спортрал, туризмалул ва экономикалул цаймигу бутIраву.
Гара кьини Владимир Васильев ва Русттам Минниханов кIул хьунни Республикалул МФЦ-лул давурттащал.

ХIадур бувссар
ХI. Аьдиловлул