[dropcap]Ф[/dropcap]евраль зурул 2-нний Лакрал райондалул администрациялий Азирбижаннал инсаннан аьрасатлувнал паспорт буллунни. Райондалул тарихраву ва цалчин­сса иш бур цамур билаятрал инсаннал аьрасатлувнал паспорт лавсъсса.

Аьрасатнал гражданиннал присяга кьамул бувну махъ, паспортру булайсса отделданул каялувчи Аьли Бугъраевлул паспорт буллунни Рамазанов Валижа Жавраиллул арснахьхьун. Ванал нину-ппу бур ЦIущарниятусса, ччянива тийх, Азирбижаннай, миналул хьусса. Лакку душнищал ташу бувну махъ Бакуй ялапар хъанай хъунма хIал къабувну, Валижа МахIачкъалалив ивзун ур. Цала кулпат Асиятлущал хъуни буллай ур кIия арс.
Райондалул администрациялул бакIчинал хъиривчу Абакар Къюннуевлул, Валижа барчагу увну, чIа увкунни ванан, цува рязину аьрасатлувнал гражданство ларснавхьур, цала «цIусса ватандалун» учIи лякъинну зун ва захIмат буллан.

З. Тахакьаева