Шинал хIасиллу дунни

Февраль зурул 9-нний Национал библиотекалий хьунни Да­гъусттаннал динийсса иширтталсса буллалисса комитетрал ларгсса шинал дурсса даврил хIасиллу дуллалисса ва 2018 шинал дуллантIисса давурттив ххал дигьлагьисса коллегия.Агьаммур доклад бунни кIицI лавгсса комитетрай каялувшиву дуллалисса МахIаммад АьвдурахIмановлул. Дагъусттаннал муфтий, Щайх-АхIмад Апаннинал барчаллагь увкунни комитетрал коллективрахь муфтиятрацIун бавкьуну, уртакьну зузаврихлу.


П. Рамазанова
«ХьхьичIми шиннардий­сса ишру ва опыт хIисавравун лавсун, ларгсса шин даркьу­сса дия, республикалий къа­ххуйсса ишру къахьун битан динийсса идарартту уртакьну зий бивкIунни. Жулва цинявннал аьм­сса мурадгу терроризмалун ва экстремизмран ххуллу кьукьавур», — увкунни муфтийнал.
Коллегиялий докладру бунни Дагъусттаннал хIукуматрал хъунаманал хъиривчунал къуллугъ чIумуйну бартбигьлагьи­сса Рамазан Жяъпаровлул, Халкьуннал Мажлисрал комитет­рал хъунама МахIаммадкьади ХIасановлул, муфтийнал кумагчи МухIаммад МахIаммадовлул, МахIачкъалаллал епархиялул жаваб дулайсса секретарь, иеромонах Иоаннул, Дагъусттаннал ягьудинал ккурандалий каялувшиву дуллалисса Валерий Дибияевлул, Гуманитар- педагогикалул колледжрал директор ЯрахIмад ХанмахIаммадовлул. Шаннагу диндалул агьлу бавкьуну яхъанай бушиврия ва утти­ния тинмайгу кувннащал кув бавкьуну зун аьркиншиврия бия коллегиялийсса чIявуми ихтилатру. Докладирттах вичIи дирхьуну махъ Комитетрал гьашину дуллантIисса давурттал проектругу ххал диргьунни.