Халкьуннал ихтиярду дуруччавур къуллугъчитурал бурж

[dropcap]Ф[/dropcap]евральданул 20-нний МахIачкъалалив Аьрасатнал Пре­зидентначIасса халкьуннал ихтиярду дуруччавриха зузисса советрал вакилтал бувкIунни. Мунил председатель Михаил Федотов, Максим Шевченко ва Евгений Никитский республикалийн бучIаврил мурадгу бия низам дуруччай къуллугъирттал чулуха ихтиярду ссуссукьу дурсса халкьуннаясса аьрзирдах вичIи дирхьуну, миннул хъирив лавну, закондалул ххуллу-хха лякъинсса.


Залму АьбдурахIманова
Аьрххилул цалчинмур кьинива «Черновик» кказитрал редакциялий СПЧ-лул вакилтал хьунабавкьунни республикалул СМИ-лул журналистътуращал.
БатIаву тIитIлай, ДР-лул Журналистътурал союзрал хъунама Аьли Камаловлул кIицI лавгунни махъсса мукьва-ххюва зурул мутталий республикалул политикалул оьрмулуву ттинин Дагъусттаннал халкьуннан макIра къаккарксса дахханашивуртту хьушиву.

[pullquote]«ЦIана дуснакь бувминнавух, коррупциялувух хIала-гьурттуми къуллугъчитал бакъа­ссагу, буссар жула даврил уртакьтал, журналистътал оьрмулуцIа бувмигу. Жува, мунийгу гьашиву къадурну, Дагъусттаннай ливтIусса цинявгу журналистътурал хIакъиравусса силистта бакIуйн буккан бан аьркинссар. Му жува тIалав бантIиссар Дагъусттаннал цIумур каялувшиндараягу», — увкунни М. Шевченкол.[/pullquote]

«Республикалий 20-25 шинал мутталий хъанай бивкIмуния бизар хьуну, шацI хьусса жула халкьуннаща бюхъантIиссар вания гихунмай, цаллами ихтиярдугу душиву кIулну, цумур-цагу ишираву, нигь-ццах бакъа миннул хъирив бу­ккан. Баххана хьунни жулла ихтиярдал ялув бавцIуну бикIан аьркин­сса къуллугъирттал каялувчитал, цIубуккан аьркинссар жула миннайнсса умуд-вихшалагу», — увкунни Аь. Камаловлул.
«Черновик» кказитрал директор Магьди Камаловлул вакилтурахь бувсунни Дагъусттаннай журналистътал литIаврил, хаснува ХIажимурад Камалов ва АхIмаднаби АхIмаднабиевлул, хIакъираву бачин бувсса силистта наниссаксса хIаллай низам дуру­ччай къуллугъру ттинин биччибакъа бивкIшиврия ва цIанагу республикалий журналистътал нигьачIакIул буллай, судирттал тIиртIусса заседаниярттайн къаитабакьлай, ихтиярду ссуссукьу дуллалисса ишру шайшиву.
«Низам дуруччай къуллугъир­ттал дакъар жущал цукунчIавсса дахIаву. Республикалий ци-бунугу ца иш хьурча, жухь аьркинсса информация къабуслай, жуяту кьюлтI буллай, хIала буххан къабитлатисса ишру чансса бакъар. Ваная-таная информация тIалав буллаяр, жун тIайланма миннал зумату баян ччай бур жуйнма багьаймур», — увкунни М. Камаловлул.
Максим Шевченкол кIицI бувунни вай масъаларттугу Пре­зидентначIасса батIаврий кIицI лагантIишиву ва маслихIат бувунни республикалул журналистътуран, цачIун хьуну, цала ихтиярду дуручлан.
[dropcap]М[/dropcap]укунма республикалий хъанахъисса дахханашивурттал хIакъиравусса ихтилатраву М. Шевченкол кIицI бувунни цал хъа бувну бивкIшиву, ХIажимурад Камалов ивкIусса чIумал, та-бунугу га оьрмулуцIа ан кьаст лархIуми дуснакьрайн бакьинмур бувансса, силистталул хьхьичIсса барурдугу хIасул буллай диркIшиву республикалул хьхьичIмур каялувшинна.
«ЦIана дуснакь бувминнавух, коррупциялувух хIала-гьурттуми къуллугъчитал бакъассагу, бу­ссар жула даврил уртакьтал, журналистътал оьрмулуцIа бувмигу. Жува, мунийгу гьашиву къадурну, Да­гъусттаннай ливтIусса цинявгу журналистътурал хIакъиравусса силистта бакIуйн буккан бан аьркинссар. Му жува тIалав бантIиссар Дагъусттаннал цIумур каялувшиндараягу», — увкунни М. Шевченкол.
[dropcap]Ш[/dropcap]аэр ва жяматийсса ишкка­кку Миясат Муслимовал цила ихтилат­раву кIицI бувунни Дагъусттаннай ва щалагу дунияллий бусравсса, бюхттулсса гьунарданул заллу, композитор Ширвани Чаллаевлул чирчусса ва закондалул ххуллу-ххуттай кьамул дурну диркIсса гимнгу зана дан аьркиншиву цила кIанайн.
Журналистътуращалсса хьунабакьаврия махъ СПЧ-лул вакилтурал вичIи дирхьунни, ва ххуттайн лавсунни, укунмасса халкьунная­сса аьрзардахгу.