ОьхIалсса канил дурсса оьхIалсса даву

[dropcap]Ф[/dropcap]евраль зурул 18-нний Къизлардай, Георгий Победоносецнал килисалуву, 22 шинавусса жагьилнал, авчинал ттупанграва бивтун, 5 хъамитайпа оьрмулуцIа бунни, щавурду дирсса 4 инсан, азарханалийн иян унни. КIиннал тагьар цIанагу захIматсса дур.


Щавурду дирминнаву ца полициялул, ца Росгвардиялул зузала ур. Бивтма Къизлардай ялапар хъанахъисса жагьил ивкIун ур. Ва усса кIанай оьрмулуцIа увну ур леххаврий бувкIсса полициялул зузалтрал.
[dropcap]В[/dropcap]а иширал хIакъираву уголов дело сукку дурну дур.
Ва оьсса бала хьуну бур Масленицалул байрандалул чIумал. Да­гъусттаннал Муфтият дащуй бихьлай бур инсаннай къия дур­сса цумурцагу иш.
— Ислам хьхьичIун дакьлай, укунсса баларду буллалисса вагьабистал – ми исламрая архсса инсанталли, — тIий, баян бунни Дагъусттаннал бусурманнал рувхIанийсса управлениялул вакилтурал.
Къизлардал азарханалий щавурду дирминнан аьркинсса медициналул кумаг буллай бур.
[dropcap]В[/dropcap]а ишираву оьрмулуцIа хьуминнал ва щавурду дирминнал гъан-маччаминнан психологтурал чулухасса кумаг буллай бур Дагъусттаннал ЦIуллу-сагъшиву дуруччаврил министерство.
АпатI хьуминначIан иян хIакинтурал группалущал ув­кIунни Медициналул ва биологиялул федерал агентствалул хъунама Владимир Уйба.
Щавурду дирминнах уруган увкIунни мукуна Дагъусттаннал цIуллу-сагъшиву дуруччаврил министр Танка Ибрагьимов. Ванал бусласимунийн бувну, операция бувсса кIива хъамитайпалул тагьар захIматсса дур, вайми оьккину бакъар.
— Пост байбихьлахьисса чIумал инсантуран укунсса бала баву – му Ккавкказнаву цимирагу ттуршукулий нахIу-хIалимну яхьусса бусурманнал ва православиялул диндалул инсантурал дянив дичинсса провокацияр, — тIий ур патриарх Кириллул пресс-секретарь Александр Волков.
[dropcap]У[/dropcap]хссавнил Ккавкказуллал федерал округрайсса Аьрасатнал Президентнал вакил Олег Белавенцевлул баян бунни: «Масленицалул махъра-махъсса кьини укунсса вахIшисса, оьхIалсса даву дурсса инсантураща, ци пикрирду хьхьичIун ласларчагу, ци лаххия ларххун занарчагу, къахьунтIиссар Ухссавнил Ккав­кказнаву нахIуну, бавкьуну яхьусса личIи-личIисса диннал агьулданул дянивсса арарду лиян дан».
АьФ-лул Бусурманнал рув­хIанийсса управлениялул чулуха оьзру хьусса инсанту­рал гъан-маччаминнащал кьурчIишиву кIидачIлачIисса жижара бунни Муфтий щайх Равиль Гайнуттиннул.
— Укунсса кьини дурксса чIу­мал, Аьрасатнал цинявппагу бусурман балаллухьхьун биривминнал чIарав бацIан аьркин­ссар. ЦукунчIав къабучIиссар жула билаятрай ялапар хъана­хъисса бусурманнал ва ххачпара­снал дянивсса арарду оьлуккин дуллан. Укунсса чIумал ккаккан дан аьркинссар жулла цашиву, кувннал чIарав кув бацIайшиву, — увкунни ванал.