[dropcap]Г[/dropcap]ъумучиял школалий хьунни ниттил мазрал кьинилун хас дур­сса линейка. Муний гьуртту хьунни мюрщими классирттал дук­лаки оьрчIру. Завуч Ххадижат МахIаммадовал бувсунни ниттил мазурдил барзну баян бувну биявхьур, ва зурул лажиндарай гьарца классрал бакIра-бакIрах дантIисса давурттая.

Зулайхат Тахакьаева
Дуклаки оьрчIал дурккунни ниттил мазран хас дурсса наз­мурду, жунна хъамаритала хьу­сса ичIаллил кьайлул, тIахIни-кIичIулул, дукиялул, ххяххияр­ттал, ахънилссаннул цIарду кIицI дуллалисса назмурду.
Ниттил маз буруччияра тIисса оьвчавурттавух дия «Лакку маз ле­ххаву тIий бур, ххассал бара тIий» тIисса плакатгу.
ЧIалачIисса зат бур ниттил мазрал кьинилун хас дурсса акциярдайну маз ябан къашайшиву, ла­кку мазрал учительница Роза Бавасулаймановал тIийкун. Лакку мазрал дарсру сандакъул дуллалиминнан­сса дарсну кунма бия мюрщултрал ккалаккисса нацIусса ниттил мазрайсса шеърирду.