[dropcap]Я[/dropcap]тIул чяхирданул ттангъа хьусса кIанайн дутIин аьркин­ссар дачIи-дачIину хIала дурсса водородрал перекисьралва хьюмусса ссахIвандалул раствор.Ца минутIравун шюшара.

* * *
Аьгъушиврул ттангъа хьу­сса кIанайн бичин аьркинссар крахмал, цаппарасса хIаллавун кIирисса щинай шюшин.

* * *
Кофелул ттангъа хьусса кIанайн ссирка (уксус) дуртIуну, чансса хIаллавун шюшин аьркинссар.

* * *
Аьтрилул ттангъа хьусса кIанайн дутIин аьркинссар щинал кIива бутIущал ца бутIа содалул хIала бувсса хьюмушиву, ххуйну дюххансса куццуй. Шюшин 15 минутIравун.

* * *
Щекьирал ттангъа дусса кIану накIливу хьхьувайния кIюрххилнин аьваян кьабитан аьркинссар, кIюрххил – шюшин.

* * *
Гьухъал ттангъа гьан дуван бюхъантIиссар лимондалул сокращал хIала бувсса содалул кумаграйну. Вай хьюмушиву дуртIусса янна, 15 минутIрайссагу диртун, шюшин аьркинссар.

* * *
Урттул ттангъа хьусса янна, ттангъа кьакьан къадиртун, цIугу бивчусса гъилисса щинаву аьраян дишин аьркинссар 2 ссятрайсса. Яла зура шюшай­сса куццуй шюшара.
* * *
Оьттул ттангъа хьусса кIанайн ссирка дуртIуну, 10-15 минутIрайсса диртун, шюшин аьркинссар.

* * *
КкярчIулачIи ларчIсса янна цаппарасса хIаллай дишин аьркинссар морозильникраву, яла, дизан дуван шаймур дурну, лирчIмур уайт-спиритрай марцI дувара.