Интнил вакил

[dropcap]М[/dropcap]асленицалул нюжмар наниссаксса хIаллай, яни февральданул 12-нния 18-ннийн бияннин, МахIачкъалаллал идарар­ттайгу, республикалул цайми шагьрурдайгу хьунни личIи-личIисса шадлугъру, ххюлтIурдал ярмаркартту, оьруснал культура ккаккан дуллалисса батIавуртту, выставкарду.

Бадрижамал Аьлиева
ЦIакь хьусса аьдатрайн бувну, Оьруснал театрданул хьхьичIсса майданнив хьунни тяхъасса тIуркIурду. Спортралми бяст-ччаллал майданну хIадур бувну бия МахIачкъала шагьрулул Спортрал, туризмалул ва жагьилтурал иширттал комитетрал.
ХхюлтIурду, оьруснал миллатрал цайми-цаймигу дукрарду ххираминнаща ми ххал дуван бюхълай бия. Мукунмирив хъинну чIявусса бия.

Театрданул жанахIраву хьунни оьруснал халкьуннал канил пишардал мастер-классру.
Оьруснал театрданул Хъунмур залданул сахIналий тIурча, хьунни 300-нния ливчусса гьур­ттучиталгу бусса хъуннасса концерт, «Идет весна. На дворе Масленица» тIисса цIанилусса.

Ярг-яргсса номерду ккаккан бунни республикалул паччахIлугърал ва халкьуннал коллективирттал: Опералул ва балетрал хор, Ссихьрал театр, «Каспий» ва «Эридан», казактурал балайлул Терскаллал ансамбль, «Эхо гор», «Молодость гор», «Дараччи» (ЦIуссалакрал район), «Калинка», «Лукоморье» ва чIярусса цаймигу. ХьхьичIми шиннардий кунма, бия республикалул дазул кьатIатусса хъамалгу – Перьм шагьрулиясса къавтIаврил «Солнечная радуга» цIанилусса ансамбль. Тамашачитал хъинну рязину ливчIунни.

Ва байран сакин дурну дия оьрус миллатрал масъалартталсса буллалисса ХIукуматрал комиссиялул, ДР-лул Культуралул министерствалул, ДР-лул Культуралул министерствалучIасса Рес­публикалул Халкьуннал творчествалул къатлул, МахIачкъала шагьрулул администрациялул, муниципал сакиншиннардил чIарав бацIаврийну.

ЧIяру динну, чIяву миллат­ру бусса Дагъусттаннай уку-укунсса байранну кIицI лаглагаврия хъунмасса хайр-мюнпат бур миллатирттал дянивсса дахIаву цIакь давриву, личIи-личIисса миллатирттал инсантал кувннан кув бувчIавриву. Ва нахIусса, нацIусса, цинявннан дурчIайсса байран ялу-ялун ххира хъанайгу дур, оьруснан дакъа, цайми миллатирттал инсантурангу.
Ва байрандалийнсса хIадур­шиндарал хъунмур хъар, гьай-гьайгу, дагьунни Республикалул Халкьуннал творчествалул къатлул зузалтрайн. Му Къатлул директор Марита Велихановна буслай бур:
— Жулла республикалий «Мас­­­леница» байран оьруснал халкьуннал культуралул агьаммур майданну хъанай 15 шинни. ХIакьину гьашинумур «Масленица» щаллу хьурив, жу байбишайссару хъиривмунил ялув пикри буллай, мунил программалулсса тIий, сюжетралсса, постановкалулсса тIий буллай.

Гьашинусса шин Балетрал шинну баян бунни АьФ-лул Президентнал, мунийн бувнугу сакин дурссия ва байрандалул программа. Байбихьулий кка­ккан буварду магьа, яла – Дагъусттаннал халкьунналмур культура, жува цинявппагу цачIу, архIал бушиву бувчIин буллай. Миллатирттал дянивсса нахIушиву – му яла багьлул ххирамур хъу­сри, инсан цIуллуну-сагъну унугу, лагма-ялтту нахIушиву, паракьатшиву дакъахьурчагу, му талихI бусса инсаннан ккалли уван къабюхълахъиссар. Барчаллагь цинявппагу гьурттучитуран бувсса захIматрахлу.