[dropcap]Ф[/dropcap]евраль зурул 6-нний Дагъусттаннал Журналистурал союзрал къатраву хьунни Аьрасатнал Виричу М. НурбахIандовлуясса «Зузияра, уссурвал» тIисса киноленталуха зузиминнащалсса хьунабакьаву. Художествалул фильм ласлантIий бур Дагъусттаннай гьашину интту ва гъинттул чIумал. Муниха зий бур цIана «Жула жагьилтал» тIисса студия. Суратрал генеральный продюсер ва соавтор Петр Алешкиннул бувсунни му кино ласунсса пикри цанма цукун хьуссарив.

Андриана Аьбдуллаева
— Телевизордавух НурбахIан­довлун хьумур ккавккукун, му иш жун хъинну асар хьунни. «Жула жагьилтал» тIисса медиахолдинграл генеральний продюсер Татьяна Васильевнал маслихIат бунни муния тамашачитурахь бусан.
Ва пикрилущал на лавгра муниннин кIулну ивкIсса ДР-лул Кинематографистурал союзрал хъунама МахIаммад СулаймановлучIан, ванангу жул пикрилий дакI даркьунни, – бувсунни П. Алешкиннул.
Мукунма ванал бувсунни сурат­рал агьамма герой чIявуссаннал хасиятру цачIун дурсса икIантIишиву, ванал цIагу МахIаммад дикIантIи­шиву, бувчIин бунни ва, документал дакъа, художествалул фильм дуну тIий, агьамма геройнал сипат щала сурат хас дурсса Дагъусттаннал полицейскинаха лархьхьусса къадикIантIишиву, цIанасса цала аьрххилул мурад НурбахIандовлул гъан-маччанащал, дустуращал, архIал зий бивкIминнащал хьунабакьаву ва мунал хасиятирттая ххишалану кIул баву бушиву.
Сценарийлул соавтор ва режи­ссер Владимир Чеботаевлул бувсунни роль дугьлагьимигу 90% Дагъус­ттаннал артистал бикIантIишиву.
— Жуща хьунссия машгьурсса зул агьулданул сипат дусса артист Москавлия уцингу, амма жун аьркинни шиччавасса, ци-цукун дантIиссарив буслан къабагьантIисса, иш багьарча, НурбахIандовлул дурмур дан махъунай къахьунтIисса инсан, — увкунни режиссернал. Уттинин актертурах бурувгунни Къумукьнал театрдануву, утти ххал бантIиссар республикалул ваймигу театрдаву ва Избербаш шагьрулий.
ХIасил, агьамми актертурая тIайла хьуну, массовкардайн бияннин, ва Дагъусттаннал кино дикIантIиссар. Сурат ласласисса группалул бачIигу Дагъусттаннал пишакартал бикIантIиссар, — увкунни режиссернал.
Петр Алешкиннул кIицI лавгунни Дагъусттаннал билаятрал караматшивугу, шиккусса ххазинасса гьайкаллугу ккаккан дан хIарачат бантIишиву киносуратрай.
Бувсунни сурат ласласисса агьамми давуртту август зуруй дайдишинтIишиву. Мукунма ванал бувсунни, ва даву ларайсса даражалий даншиврул 100 миллиондалийн дирсса арцу аьркин хьунтIишиву, цIана ми арцу ратIлай бушиву. ЧIявусса дагъусттанлувтурал – депутатътурал, жяматийсса ишкка­ккултрал, мукунна ххюра райондалул, ва мурадрай, цала счетрайн арцу дирчушиву.
— Жу хIарачат бантIиссар, Аьрасатнаву дакъассагу, кьатIаллил билаятирттайссагу тамашачитуран ккаккан дансса, ххаллилсса сурат ласун, — увкунни П. Алешкиннул.
Суратраву рольлу дугьансса артистурал кастинг хьун тIий дур Р. ХIамзатовлул цIанийсса библиотекалуву.