ОьрчIру буллан курчIил махъанарду

Найнна дур Аьрасатнал регионнай махъ шиннардий оьрчIру гьарзану ягу чанну баврил сияхIру ххал дигьаву. Масалдаран, ларгсса 2017 шинал 205 азарва оьрчI чаннубувну бур, мунил хьхьичIсса 2016 шинах бурувгун.

ХIасил, ларгсса шинал билаятрай 1, 69 млн. оьрчIал бувну бур. Махъсса ацIра шинал хIасиллах бурувгун, ва яла оьрчIру чанну бувмур шин дусса дур. 2007 шинал бувну бивкIун бур 1,61 млн. оьрчIал.
Росстатрал хъиривлаявур­ттайн бувну, оьрчIру буллалаву 10,7% лагь хьуну дур билаятрал сайки циняр регионнай.
ЛичIисса дахханашиву хьуну дакъар так Чачаннаву. 2016 шинал ва республикалий бувну бур 29 азаллий 891 оьрчI, хъиривмур шиналгу – 29 азаллий 893 оьрчI.
НигьачIисса тагьар дусса дур ухссавнил регионнай. Хаснува Ненецнал автоном округрай демографиялул тагьар 16 процент­рал лагь хьуну дусса дур.
Росстатрал пишакартал хъуннасса къулагъас дуллай бусса бур яла лавгсса, ливтIусса халкьуннал сияхI хъунна-чIири шаврих. Масалдаран, 2017 шинал 1, 824 млн. халкьуннал ливтIуну бур (2016 шиналнияр 63, 6 азара инсан чанну).
ЦIана Аьрасатнаву яхъанай бусса бур 146, 877 млн. халкьуннал. Ва сияхI хъунна хьуну дусса дур Украиннавасса, ТаджикIнавасса, Къазахъис­ттаннавасса, УзбакIнавасса ва Къиргъизнавасса мигрантъталгу хIисавну.

З. АьбдурахIманова