[dropcap]Ф[/dropcap]евраль зурул 8-нний МахIачкъалалив, «Ростелекомрал» къатраву, хьунни «Интернет кIулшиву дуклаки оьрчIал информациялул культура хIисаврай» цIанилусса («Интернет – грамотность как элемент информационной культуры школьников») ккуркки стол. Ванил сакиншинначитал бия «Ростелеком» ва Да­гъусттаннал жагьилтурал министерство.

---

Ккуркки стол хьунни январь зурул 30-нния байбивхьуну февраль зурул 6-ннийн бияннин нанисса, нигьачIаву дакъасса Рунетрал нюжмардул лагрулий.
Шикку гьуртту хьунни «Ростелеком» ПАО-лул Дагъус­ттаннал филиалданул техникалул директор МахIаммадшарип Рамазанов, Дагъусттаннал жагьилтурал иширттал министрнал кIанайсса Камил Сяидов, ДР-лул печатьрал ва информациялул министрнал хъиривчу Сергей Снегирев, «Пери» филиалданул кIулшивуртту дулаврил программарттал каялувчи Махач Косоев, мукунма «Изучи интернет – управляй им» конкурсраву гьурттушинна дурсса МахIачкъалаллал, Къизлардал, Буйнакскаллал, Дарбантуллал, Бугленнал школардаясса учительтал ва дуклаки оьрчIру.
Дуклаки оьрчIащал тIай­ланнасса эфирданий ихтилат бунни щалагу Аьрасатнаву баян бувсса «Изучи интернет – управляй им» тIисса онлайн-чемпионатрал сакиншинначитурал.
ОьрчIал цIухху-бусу бунни интернетрал хIакъираву цанма кIул хьун ччимуния, уттиния тихуннай хьунтIисса конкурсирдая.
Виктория Бунчуклул (Координационный центр национального домена Ru/РФ) бувсунни «Изучи интернет – управляй им» тIисса проект дахьва сетирдаву щурун бивкIминнан кIулшивуртту дулайсса проект душиву. Гьарица шинах проектрал лагрулий дуклаки оьрчIал дянив интернет кIулшиврул чемпионат шайшиву, ванил мурадгу оьрчIал кIулшивуртту ххишала даву, миннан информациялул технологиярттащал зун ла­хьхьин баву ва пиша язи бугьан кумаг баву бушиву.
— Жула билаят хьхьичIунмай хъит учин бансса ца чаранну хъанахъиссар цифровая экономика. Ва отрасль хьхьичIуннай шавривурив хъунмасса бияла буссар жула жагьи-жугьултрахь. Республикалий цалчин да­къар укунсса конкурсру хъанахъисса. Дагъусттаннал командарттал, ми конкурсирдаву гьуртту шаву бакъассагу, хьхьичIунсса кIанттурдугу бугьлай бур. Ларгсса шинал Дагъус­ттаннал командалул бувгьу­ссия 2-сса кIану. Жула ккаккияр­тту хъиннура ххуй дан, оьрчIал интернет-кIулшивуртту ласун­сса шартIру дузал дан хIарачат буллантIиссару, — увкунни цала ихтилатраву Сергей Снегиревлул.
— ОьрчIру интернетраясса нигьачIаврия мюхчан бан хъуннасса къулагъас дикIан аьркинссар хъуниминнал. ОьрчIан лахьхьин бан аьркинссар интернет мюнпатну ишла дан, муния шайссаксса хъунмасса хайр ласун.
Му чIумал цIусса технологиярттая оьрчIан нигьачIаву да­къассар, миннул ялунгума жула оьрчIру итххяххан бантIиссар, — увкунни Жагьилтурал ишир­ттал министерствалул вакил Наиля Апанниевал. Ихтилатру къуртал хьуну махъ конкурсраву хьхьичIунсса кIанттурду бувгьусса оьрчIан дуллунни дакIний личIансса бахшишру.