[dropcap]П[/dropcap]ассажиртал бувцуну ва кьай ларсун заназиминнал закондалул тIалавшиннарду цукун дуручлай бурив ккаккан ялув бацIаву ва машинарттай заназиминнал мюхчаншиву дуруччаву мурадрай, ДР-лул Минтрансэнергосвязьрал сакин бувну бур личIи-личIисса министерстварттал ва управлениярттал вакилтураясса ххалбигьавуртту дансса группа. Жулла регион терроризмалиясса нигьачIаву хъуннасса регион дур. Террористурая нигьачIаву дусса объектирдавасса ца хъанай дур транспортрал инфраструктура, му мюхчан даврил масъалагу хьхьичI ххуттайн ласун багьлагьисса масъала бур.
Ххал бигьавуртту дурсса зузалтрал кIул бунни хIакьинусса кьини республикалий 15 автовокзал ва автостанция зий бушиву, миннува 9 автовокзалданул хIакъираву цуксса нигьачIаву дуссарив кьимат бивщунни. Ми гьануну лавсун сакин дунни ва цIакь дунни транспортрал мюхчаншиву дузал даврил план.
ХIакьинусса кьини цавагу автостанция цинярдагу мюхчаншиврул тIалавшиннардан лайкьсса бакъар. Инсантал ца региондалия цамунийн буцлацисса цаппарасса автостанциярттай (Избербашуллал, Каспийскаллал, МахIачкъалаллал – «Южная», Дарбантуллал – «Северная») цIанагу щаллу дуллай бакъар Транспортрал мюхчаншиврул хIакъиравусса («О транспортной безопасности») Федерал закон.
Сайки цавагу автостанциялий ххал буллай бакъар пассажиртал ва кьай. Муххал зат кIул дайсса хах бивхьуну бунугу, приборданулсса буллалисса зузала акъар. Автостанциялул къатравун бувххун нанисса чIумал, пассажиргу, кьайгу ххал дуллай бур так ца-кIива автостанциялий (МахIачкъалаллал «Северная», «Южная» ва МахIачкъалаллал «РДР»).
Цинявппагу автостанцияртту ва автовокзаллу бусса кIанттурдай бур чIявусса ттучанну ва машлул лавкарду, бур автостанциярдай бацIансса ихтияр дакъасса машинартту. Ялув бацIаву дан сакин бувсса группалул гьарица объектрайсса диялдакъашивурттал хIакъираву справкарду чирчуну дур Ространснадзорданул кIанттул управлениялийн тIайла дуккан, миннал пландалий дакъасса ххал бигьавуртту даву мурадрай.
ДР-лул Минтрансэнергосвязьрал ххалбигьавурттал хIасиллу дуллалисса совещаниялий тапшур бунни чIирисса чIумул мутталий цинярда диялдакъашивуртту духлаган дан.
Нанисса шинал транспортрал мюхчаншиврул масъалалух ляличIину ххишаласса къулагъас дикIантIиссар, бувчIавурттацIун дархIуну, мукунма ЛачIун буккаврил Европанал ва ттуплий буккаврил Дунияллул чемпионатирттацIун бавхIуну.
