Халкьуннал Мажлисрал чярхнийсса сессиялий

Республикалул каялувчинал депутатътуран ккаккан увунни ДР-лул ХIукуматрал председательнал къуллугърайнсса кандидат. Владимир Васильевлул бувсунни му хьхьичIунну зий ивкIшиву Татарсттан республикалул экономикалул министрнал къуллугърай.


Февралданул 7-нний хьунни ДР-лул Халкьуннал Мажлисрал «Единая Россия», «Справедливая Россия» ва «Коммунистическая партия Российской Федерации» партиярттал фракциярдал батIаву. Муний гьуртту хьунни ДР-лул БакIчи Владимир Васильев, ДР-лул Халкьуннал Мажлисрал председатель Хизри Шихсяидов ва ДР-лул ХIукуматрал председательнал къуллугърай итансса кандидат Артем Здунов.
Парламентрал председательнал ва фракциярдал каялувчитурал депутатътурахь бувсунни 18-мур сессиялул кьинилул масъала бушиву «Дагъусттан Республикалул ХIукуматрал Председательнал къуллугърай итаншиврулсса рязишиву дулаврил хIакъираву» тIисса.
Республикалул каялувчинал депутатътуран ккаккан увунни ДР-лул ХIукуматрал председательнал къуллугърайнсса кандидат. Владимир Васильевлул бувсунни Артем Здунов АьФ-лул зузалтрал луртандалуву (кадровый резерв) цалчинма ивкIшиву губернаторнал къуллугърай битанминнавух. Мунияр ххишалагу, му хьхьичIунну зий ивкIшиву Татарсттан республикалул экономикалул министрнал къуллугърай.
Яла Артем Здуновлул жаваб­ру дуллунни депутатътурал суаллахьхьун.
Фракциярдал хъин чулий ккар­ккунни сессиялий хьхьичIун ларсъсса кандидатура ва кьинилул ма­съала.

ХIадур бувссар
ХI. Аьдиловлул