Чаннасса ссавний­сса къув-аьс кунма, ца лахIзалий ппив хьунни Да­гъусттаннал хъуни къуллугъчитал бувгьу­сса хавар. Чаннаннил бару лагма бувсса кунна чIалачIисса Да­гъусттаннал властьрай та-дунугу укун хар-хавар бакъасса дахханашивуртту хьунссар тIисса нажагьсса акъахьунссия. 
«Ххарирув, бигьалавгрув», — тIутIиссагу бур цаппара хъин дакIурдил заллухъру соцсетирдаву. Юх, бакъара щинчIав хьу­сса оьбалдарая ххарину, къаччива цу-ухьурчагу суд-диваннахун агьну, дуснакьирттайн бавкьуну. Амма укун, цайми республикарттах бурувгун, лащинну ялапар хъанайгу къабучIирухха жува. ЧIуннихха. Цуксса хIаллайри къуллугъру ваца ирсирай кунма най бикIантIисса жучIава.
Ххарира, гьакссагу ххарира, агарда вай дахханашивурттайну жула халкьуннал оьрмулул тагьаргу, багьу-бизугу чансса бухьурчагу лайкьсса чулийнмай баххана хьун най бухьурча.
Хьунхьуви дарсну махъми къуллугъчитурангу тIий бура. Зана хьунхьуви, ахир­гу, Дагъусттаннайсса тIай­ла­дакъашивурттал тири-хъи­ри бувсса жула пишакартал, бюхъу-бажар бусса жагьилтал цала миналийн тIий бура.
Цаппара зурдардил хьхьичI, Владимир Васильев Дагъусттаннайн увкI­сса чIумал, хаварду личIи-личIисса бия. Ццахханну рутлатиссагу, хьул-умуд бишин буллалиссагу. Къа­кIулли гихунмай иш цукун багьантIиссарив, цал­ссарив ттун «Виват король!» учин ччай бур.

Андриана Аьбдуллаева