Хъин чулий ккарккунни

Февраль зурул 2-нний МахIачкъалалив хьунни Дагъусттаннал региондалийсса «Справедливая Россия» партиялул отделениялул вакилтуращалсса пресс-конференция. Шикку ххал бигьлагьисса масъаларттубия март зурул 18-нний хьунтIисса Аьрасатнал Президент увчIлачIисса бувчIавурттал хьунийнсса.


Имара Саидова
Конференциялул даву дачин дурну бия Дагъусттаннал региондалийсса «Справедливая Россия» партиялул отделениялул председатель Камил Давдиев ва партиялул Советрал Бюрорал секретарь Мурат Пайзуллаев. Камил Давдиевлул бувсунни партиялул ларгсса шинал декабрь зуруй хьусса Съездрай Аьрасатнал президентнал бувчIавурттай Владимир Путиннул кандидатура дурчIинсса хIукму кьамул бувну бивкIшиву.
— Аьрасатнал Президентнал бувсса ва чара бакъа биттур бан аьркинсса «май зуруйсса» хIукмурду бур жул партиялул программалийн тIайла бацIлацIисса. Налогир­ттал, МРОТ-рал лагру гьаз даврил, цIуллу-сагъшиврул ссуссукьушиву дусса инсантурая аьрщарахсса налогру яла дичаврил ва цаймигу масъаларттал хIакъиравусса партиялул чулухасса сиптардугу Аьрасатнал Президентнал ххуй чулий ккарккунни, — увкунни региондалийсса фракциялул каялувчинал.
Камил Давдиевлул балжину бувсунни партиялул Социал манифестрал программалия. Муния махъ ванал жавабру дуллунни журналистурал буллусса суаллахьхьун.
«Социал манифестрал» прог­раммалул хIакъираву буллусса суалданухьхьун жаваб дуллай, Мурад Пайзуллаевлул бувсунни республикалий цIуллу-сагъшиврул мушакъатшиву думиннан дагьай­сса шартIру дузалну дакъашиврул хIакъиравусса масъала гьаз бувшиву ДР-лул Халкьуннал Мажлисрайгу. Партиялул чул бувгьуминнал кIицI лавгунни ва масъалалул ялув цивппа уттигу бацIантIишиву ва республикалий мушакъатшиву думиннансса реабилитациялул центр тIитIин сиптачитал хьуминнал чIарав бацIан хIадурну бушиву.