[dropcap]Ф[/dropcap]евральданул 11-нний МахIачкъалалив ДР-лул культуралул министрнал буржру чIумуйну биттур буллалисса Зарема Бу­ттаевал сипталийну хьунни «Хъиншиврул автобус» («Автобус добра») тIисса цIанилусса акция. Акциялул агьаммур мураднугу бур шагьрулул культуралул ва социал оьрмулул аралувун шайссаксса чIявусса бугьарасса инсантал кIункIу баву.

Бадрижамал Аьлиева
[dropcap]В[/dropcap]а журалул проект, жучIара дахьра щурущи дулларчагу, зий дуссар Аьрасатнал хъунисса шагьрурдай.
Зарема Буттаевал сипталул чIарав бацIаву дурну, ва давривух гьуртту хьунни ДР-лул ЗахIматрал ва соцлябуккаврил министерствагу.
«Хъиншиврул автобусрай» 30-яксса пенсионер экскурсиялий бувккунни МахIачкъала, Каспийск шагьрурдайх. Ахирданийгу «Хъиншиврул автобус» бавцIунни М. Горькийл цIанийсса Оьруснал театрданучIа. Мива бувксса хъамал хьунабавкьунни ДР-лул захIматрал ва соцразвитиялул министрнал буржру чIумуйну биттур буллалисса Расул Ибрагьимовлул.
Оьруснал театрдануву пенсионертуран уква ккаккан бунни театрданул репертуарданува­сса «Смеется ли Чехов…» тIисса спектакль.

Ва проектрая Зарема Буттаева буслай бур:
— ДакI ххари хъанай дур, уку-укунсса проектирдайн бувну, оьр­мулул бугьарасса инсантурал чурххал хIал, дакIнил тагьар ххуй дан бюхълай буну тIий, ми Да­гъусттаннал культуралул оьрмулуву хъанахъимунивух хIала бу­ххан бан бюхълай тIий. Оьруснал театр мудангу чIарав бацIлай бур уку-укунсса давурттал, директор Тимур МахIаммадовлул каялувшиндаралусса коллектив хIадурну бур, гьарца кьини учирчагума, хьунабакьлан укунсса хъамал. Ттул пикрилий, вагу хъанахъиссар дуниял хъин чулийннай даххана дувансса ца хIарачатну.
Ва дакъасса, гихуннай цайми-цаймигу проектру щаллу дуллан тIий бур, оьрмулул бугьараминнал оьрмулул даража лавай баву мурадрай. Занналгу кабакьиннав зуцIун.