Халкьуннал артистурал 100 шинал юбилей

Январь зурул 18-нний Москавлив Миллатирттал Къатлувун чIявусса агьлу бавтIун бия, ца кьини бувсса кIия цIанихсса Аьрасатнал ва Дагъусттаннал халкьуннал артистурал Рабадан Абакаровлул ва Ярагъи ХIажикьурбановлул 100 шинал юбилей дуван. Мунил сиптачиталгу бия Москавливсса Дагъусттаннал Культуралул центр.


ПатIимат Рамазанова
Юбилейрайн бавтIцири барча буллай, кIицI лавгсса центрданул хъунама, профессор Арсен ХIусайновлул кIицI лавгунни ЦIувкIуллал шярава бувкшиву Дагъусттаннал цIа гьаз дур­сса цIанихсса инсантал: Совет Союзрал кIийла Виричу АхIмадхан Султан, «Лезгинка» ансамбльданул гьану бивзсса СССР-данул Халкьуннал артист Танхо Израилов, ацIунная ливчусса Аьрасатнал ва Дагъусттаннал лайкь хьу­сса артистал, профессортал, академиктал.
Юбилейрал мажлис бачин бувну бия Центрданул вакил Олеся Герасименко ва цIувкIрачу Шарип Сайдуев. Агьали барча бувна ЦIувкIуллал Шяраваллил советрал вакил, профе­ссор АьвдурахIман Халиловлул, цIувкIуллал пагьламантурал нас­лулиясса артистурал Асият ва Зульфия Агъаевахъал, Ярагъи ХIажикьурбановлул циркравун увцусса азирбижаннал пагьламан ХIусайн ХIамдуллаевлул, Москавуллал этнокультуралул ва жагьилтурал ккурандалул вакилтурал.
Ва юбилейрай ккаккан дуваншиврул, Москавлив телевидениялий режиссерну зузисса цIувкIрачу Зураб Кьур­банмахIаммадовлул «Ссавруннал ва аьрщарал дянив» («Между небом и землёй») тIисса документал журалул киносурат хIадур дурну дия, артистурал оьр­мулия ва магьирлугърая бусласисса. Ярагъинал душнил, Дагъусттаннал лайкь хьусса артистка ПатIима ХIажикьурбанова- Медниковал видеообращение гьан дурну дия, цинма чара бакъасса аьрххилий Лондоннайн гьан багьшиву бусласисса ва цинявн­нахь барчаллагь тIутIисса. Рабадан Абакаровлул наслулия­сса артистнал, Аьрасатнал магьирлугърал лайкь хьусса ишккакку Мухтар Абакаровлулгу бувна бавтIцириннайн барчаллагьрайсса ихтилат. Ванал арс Расул Абакаровлул (пагьламантурал ххюлчинмур никирал варис), залдануву пагьламан дахIинсса сант дакъа, сахIналий ххаржантращалсса гьунарду кка­ккан бувна.
ЦIанихсса пагьламантурал юбилейрал мажлис чIюлу буван бувкIун бия Дагъусттаннал лайкь хьусса артист Рашид Багатаевгу, Ярагъинал ссил душ, балайчи Качарханум ХIажикьурбановагу. Зюннав бищун увкIун ия МахIачкъалалия Шарапи Ажубов. Шиккува бусан, ва мажлис къуртал хьуну мукьах КремлилучIа, ЯтIул майданнив, Шарапи зюннав бишлай улувкьусса видеоролик интернетраву ялу-ялун машгьур хъанай дур.
Лакрал шаэр Нураттин Юсуповлул ЦIувкIратусса пагьламан душнихасса назму дурккуна Москавлив программистну зузисса Оьмар ГъазимахIаммадовлул.
ЧIявуя ва кьини, сахIналийн бувккун, совет цирк хьхьичIуннай шавриву биялсса захIмат бивхьу­сса артистал дакIнийн бичлай, ххуйсса махъру тIутIими.

АьвдурахIман Халилов, профессор, академик, цIувкIрачу:

Ларгсса шинал октябрь зуруй «Дагъусттан» Культуралул центрданий, пагьламантурал юбилейрал хIакъиравусса батIаврий нагу гьуртту хьуссияв, тикку ттун исват хьуна юбилейраха зузими хъунмасса гъирарай зий бушиву. Амма даву вакссара укун дюрхъуну, ххуйну хьунсса ххай акъа­ссияв. Хъунмасса барчаллагь Арсен Буйдалаевичлуйн ва мунал уртакьтурайн. МахIачкъалаливнай зана шайхту, на хIарачат бувссия чIири-хъунсса даву ва иширан хасну жучIарагу дуван багьлай бушиврий цаппара агьлу мукIру буван, амма я МахIачкъалалив, я райондалий, ягу шяраву ттуща ва масъалалулсса буван кунмами чантI учин буван къавхьуна. Нагу пикри бувссия Москавлив дуллалимур мероприятиялий гьуртту хьун. Арсен ХIусайновлул ва мунал командалущал архIал барчаллагьран лайкь хьунни Москавливсса цIувкIулгу: юбилей дуван шайсса кумаг був­сса МахIаммадхIажи Загьидинов, спонсортал хIисаврайсса кумаг бувсса, кондитертурал предприятиялий зузисса группа ва каялувчитал, Лакрал театрдануву артисткану зий бивкIсса Чинара Дагирманова хIаласса душру. Циняв лагма лавгун, лажин кIялашиву дурну, халкьуннал артистурал цIардан лайкьсса байран хьугу-хьунни.

Рамазан Рамазанов, лет­чик-снайпер, Аьрасатнал паччахI­лугърал авиациялул хъунама инспектор, Аьрасатнал лайкь хьусса аьрали летчик:

Юбилейрай ккаккан дур­сса документал журалул киносурат жулва жагьилтурангу тарих лахьхьин буллалисса, ххуйсса бахшиш хьунни. Щаллагу мероприятие патриот асарду гьузиххин буллалисса дия, пахрулул асарду дакIурдивун бичлачисса дия. ДакI ххари дуллай дия чIявусса агьлу бушиврулгу. Мяйжаннугу бацIансса кIану бакъая залдануву, официал бутIа къуртал хьуну махъгу фойелуву шанна- мукьра ссятрайсса дуссухали бувну бивкIру, ппив хьун ччай бакъая, та кьини Москавуллал залдануву цIувкIуллал унгу-унгунусса байран дия.

Малик Халилбагов, предприниматель:
Ттун дакIнихтунусса барчаллагь учин ччива пагьламантурал наслулиясса Абакаров Оьмар­дул арсурваврахь – Рамазаннухь ва Мусихь. Вай жагьилтурал Москавлив чIявусса лакран, миннавухва цIувкIуллангу, зузи кIанттурду бунни, хьхьичIун бурувгсса, пахру-ххара бакъасса, инсантуран цащава шайсса кумагру буллалисса бур. Ва юбилейрал спонсоршиву дувангу миннал бакIрайн лавсун бия, фойелуву лакку дукрарду, буркив, чяйлухунсса нацIу- кьацIурду дусса столлу къур бувну бия. Жулва бусравсса ппухълуннал цIарду гьаз дуллай, жувару ххуй хъанахъи­сса, жулва оьрчIал бучIантIимур чаннасса, ххуйсса шаврил ххуллий­сса хъитри.