Школалухь хъинну хъу­нна­сса каши ду­ссар

[dropcap]Ш[/dropcap]колалухь хъинну хъу­нна­сса каши ду­ссар: чIявуну миккур жула дакIурдиву хIасул хъанай дайдишайсса оьрмулуву жува язи бугьантIисса ххуллул чIалачIин. Цукунсса школалийн, цукунсса учительтурайн ина тIайла авцIурав, мунихьгур бусса вилвамур тIайлабацIулул биялагу.

Ттунгу хьуссар тIайлабацIу цIанихсса Гъумучиял дянивмур даражалул школалий ацIилчинмур ва ацIния цалчинмур классру буккинсса. Микку ттухь дарс дихьлай буссия хъамакъабитайсса муаьллимтал: математика дишайссия Ибрагьим Исмяилович Чалабовлул, физика дишайссия Эльза Алексеевна Парамазовал, химия – Алла Ивановна Багъдуевал, тарих – Аьбдул Оьмарович Парамазовлул.
Нураттин МахIаммадович Маммаевлуя тIурча, ттухь ми шиннардий мунал дирхьуссар астрономиялул дарс. На вайннайн цинявннайн бухкъалагайсса барчаллагьрай уссара ттунгу, ттущал та 1964-кусса шинал школа къуртал бувсса оьрчIангу дуллусса куртIсса кIулшиврухлу, ххаллилсса тарбиялухлу.
Гъан хъанай дур хIурмат лавайсса ттул учитель Нураттин МахIаммадовичлул 90 шинал юбилей. Мунал цала чIумал кIава Гъумучиял школа къуртал бувну бивкIссар мусил медальгу хъиривну, мукунма марцIсса «ххювардай» яла бувккуссар Москавуллал паччахIлугърал университетрал механика-математикалул факультетгу.
Ттун дакIнивун кьуртIуну лирчIунни мунал дирхьусса астрономиялул дарсру: ­аьщуйн щусса хIисаврттайну мунал жун дурчIин дайва ссавруннал механика. Теориялулми кIулшивуртту практикалул кьяйдардайну тасттикь даншиврул дарсру дишайва хьхьунил чIумалгу. Телескопгу ларсун увкIун, жу ххал дигьин байвав цIурттал дурцIусса ссав. ХIакьинусса кьинигу дакIний бур КьутIбу-ЦIуку (Полярная звезда) лякъин бюхъайсса куц: Магъду-ЦIукуйсса (Большая медведица) кIива цIукул манзил хха бувккун, ххюйлва цаннийн ца бивчукун, ияйссар дурусну кIаничIан. ДакIний дур созвездиярттал ва планетарттал цIардугу, кIай дусса кIанттурдугу.
Ца-ца чIумал цаманахлу математикалулми дарсругу дишайва жухь Нураттин МахIаммадовичлул. Шанма категориялийхгу бавчIуну, личIи байва мунал тригонометриялул задачартту. Чичрурдугу дикIайва, аьш аьщуй дирхьуну, лазиларкьусса. Къаххирая лахъисса бувчIурду лахьхьин буллан, мяърипатрая гъалгъа тIун, насихIатру буслан.
ДакIния къадукканссар тачIав мунал педагогикалул ляличIиссара стиль, грамотность ва дакI хъиншиву.
Сулайман АхIмадов,
техникалул элмурдал доктор,
профессор