ТачIаввагу къабугьан кунма чIалачIисса кьянкьуштал
Тталаткьини Москавуллал Басман судрай Дагъусттаннал экс-премьер Аьвдуссамад ХIамидовлуй, мунал заместительталну бивкIсса Шамил Исяевлуй ва Раюдин Юсуповлуй, Дагъусттаннал кIулшивуртту дулаврил министрну ивкIсса Шагьаьппас Шагьовлуй хъунмасса лагрулул тахсир ккавккунни. Силистталул тIалавшинна дур бюджетрал арцу дарцусса ДР-лул ХIукуматрал вакилтал дуснакь бансса.
А. Аьбдуллаева
Силистталул бусласимунийн бувну, ХIамидовлул ва Шагьовлул, махинация дурну, республикалул бюджетрал арцух хъинну ххирану ларсун дур Буйнакскаллал райондалийсса Халимбек шяраву детсад тIитIинсса къатри.
Цанма кIулну бивкIун бунува «Шуринка» тIисса ресторандалул къатри, шиккувасса аьрщарал парча ва детсад бансса давуртту 12 миллиондалун дацIлай душиву, вайннал буллуну бур 31,8 миллион арцул, – буслай бур Силистталул комитетрал вакилтал.
Экс-премьернай тахсирну ккаклай бур цамургу иш. Вице-премьернал, экономикалул министр Р. Юсуповлул цачIу, ванал къабувсса къабикIан, электрон журалий баян бувну бур социал идара тIитIинсса къатри (чил билаятирттал инсантал ва гражданство дакъами чIумуйсса бацIансса) дакьин даврил аукцион. Ванил мурад бивкIун бур, «Гранд-Строй» ООО-щал паччахIлугърал контракт чирчуну, дурсса давуртту кьамул даврил ва миннух дурсса харжлугърал хIакъираву къалпсса актру чирчуну, обществалул расчетный счетрайн арцу дичин бувну, яла ми дацинсса.
Силистталул комитетрал бусласимунийн бувну, 2013-2014 шиннардий му счетрайн тIайла дакъа ва зана къаданну дирчуну дур 41 миллиондалия лирчусса арцу. Мукунма, силистталул бусласимунийн бувну, 2011 шиная шихунмай Ш. Исяев заллу хьуну ур «Орлиное гнездо» тIисса Гъуниннал шяравусса туристурал базалул. Му буллуну бивкIун бур «Маяк» ООО-лухьхьун, каялувшиву дуллан цайна мютIисса директоргу ивтун. Цайминнащал цачIу ванал хIарачат бувну бур турбаза 2014 шинайнсса республикалул адресный инвестициялул программалувун бутан, инфраструктуралун итадаркьусса арцу, дурсса давурттахсса багьагу ххишалану ккаккан бувну, цащара дацин хьуншиврул. Ванийн бувну республикалул бюджетран 35 миллиондалийн бивсса зарал хьуну бур.
Силистта найнма бур.
